महिनावारीको समयमा उषा केसीलाई साह्रै गाह्रो हुन्छ। उनमा शारीरिक कमजोरी र मानसिक तनाव एकैसाथ बढ्छ। शान्त रहन कठिन हुन्छ। स-साना कुरामा झिँजो लाग्नु र रीस उठ्नुले परिस्थिति सम्हाल्न सक्दिनन् कहिलेकाहीँ। यस पटक त उनको तनाव झनै बढ्यो। किनकि महिनावारी हुनुअघि देखिने लक्षणहरू देखिए। अर्थात्, प्रिमेन्सट्रुअल सिन्ड्रोम (पीएमएस) सुरु भयो। तल्लो पेट दुख्यो, शरीर गल्यो र 'मुड स्वीङ्ग' हुन थाल्यो। तर, महिनावारी भएन।
केही दिन ढिला हुँदा सामान्य मानेकी थिइन्। तर, दश दिन ढिलासम्म पनि महिनावारी नभएपछि उनी आत्तिन थालिन्। स्त्री रोग विशेषज्ञसँग परामर्श लिँदा – केही दिन पर्खन र पीएमएस भएर पनि महिनावारी नभएको अवस्थामा आवश्यक परीक्षण गराउने सुझाव पाइन्।
नियमित हुनेभन्दा करिब तेह्र दिनपछि उनको महिनावारी भयो। त्यसपछि पनि उनको अवस्था सामान्य रहेन। अन्य महिनाभन्दा यसपटक रक्तश्राव बढी भयो। पेट अत्याधिक दुख्यो र मानसिक तनाव र चिन्ता पनि अस्वभाविक रह्यो।
महिनावारी भएकाले उषा अस्पताल गइनन्। बरु आफ्नो अवस्था र समस्या कम गर्ने उपायबारे बुझ्न इन्टरनेट चहारिन्। सम्बन्धित लिंकहरू खोल्दै जाँदा एउटा खबरले उनको ध्यान खिच्यो।
