स्थानीय जनप्रतिनिधिले पनि उपत्यका प्रवेश नाकामा कडाइ गर्नुपर्ने तर उपत्यकाभित्रको जनजीवन सहज बनाउँदै लैजान सुझाव दिएका छन्। काठमाडौँका मेयर विद्यासुन्दर शाक्यले संक्रमण दर घट्दै गएकाले जनजीवन सामान्य बनाउनुपर्ने सुझाव दिएका छन्। उनको तर्क छ– उपत्यकामा भित्रने र बाहिरिने नाकामा अझै कडाइ गर्नुपर्छ। एकै पटक नभए चरणबद्धरूपमा खोल्दै जानुपर्छ।
नयाँ जिम्मेवारी पाएका गृहमन्त्री खगराज अधिकारीले सबै प्रमुख जिल्ला अधिकारीलाई निर्देशन दिँदै विकास निर्माणका गतिविधिलाई सहजीकरण गर्न र अझ खासगरी कृषि गतिविधिलाई सहजरूपमा अघि बढाउन समन्वय गर्न निर्देशन दिएको खबर आएको छ। स्वास्थ्य मन्त्रालयको जिम्मेवारी पाएका मन्त्री शेरबहादुर तामाङले पनि प्रमुख जिल्ला अधिकारीसँगै छलफल गरेर हरेक जिल्लामा कोभिड–१९ महामारीको अवस्थाबारे जानकारी लिएका छन्। निषेधाज्ञालाई कुन मोडालिटीबाट अघि बढाउने भन्नेबारे गृह मन्त्रालयले स्वास्थ्य मन्त्रालयसँग छलफल गर्दैछ भनिएको छ।
