शनिवार यूरोकप अन्तर्गत शनिवार फिनल्याण्ड र डेनमार्कको खेल थियो। खेलको ५९ औं मिनेटमा जोएल पोह्यानपालोले फिनल्याण्डका लागि निर्णायक गोल गरे। दर्शकदीर्घामा रहेका फिनल्याण्डका समर्थक उत्साहित हुँदै उफ्रिए, कराए। देशको झण्डा र समर्थनको नारा लागि रहँदा, जोएल स्वयंले भने गोलको उत्सव मनाएनन्।
उनी कुद्दै गोलपोस्टदेखि केही पर पुगे। उनको मुहारमा न हाँसो देखियो न निर्णायक गोल गर्नुको खुशी नै। कारण – केहीबेरका लागि स्थगित भएको त्यस खेल पुन: सञ्चालन गर्नुअघिको घटना।
सन् २०२१, १२ जुन। यूरोपकप फुटबलको मजा लिइरहेका थिए दर्शक। गोलरहित एकअर्काविरुद्ध संघर्ष गरिरहेका थिए डेनमार्क र फिनल्याण्डका खेलाडी। कुन समूहको कस्तो प्रदर्शन? रङ्गशालामा भइरहेको खेलको विवेचनाबिच देखियो यस्तो दृश्य जुन अविश्वसनीय र दर्दनाक थियो। पहिलो हाफको ४३ औं मिनेटमा डेनमार्कका खेलाडी क्रिस्टियन एरिक्सन मैदानमै ढले। आफ्नै साथीको बल पास लिनेक्रममा उनी ढल्न पुगेका थिए। घरेलु दर्शकले खचाखच कोपेनहेगन शहरको पार्केन रङ्गशालामा सन्नाटा छायो। सबै डर, निराशा र जिज्ञासा मिश्रित भावमा देखिए।
के भयो? कसरी भयो? कसैलाई थाहा थिएन। घटनाको संवेदनशीलतालाई ध्यानमा राख्दै प्रत्यक्ष प्रसारणहरू रद्द गरिए। अनि सामाजिक सञ्जाल र सञ्चार माध्यममा सुरु भयो कामनाको श्रृङ्खला। फुटबल हेर्ने, नहेर्ने सबै एरिक्सनको स्वास्थ्य लाभका लागि खर्चदै थिए शब्दहरू। कामनाहरूबिच यदाकदा उनको मृत्युबारे भ्रम नफैलिएका होइनन्। ती तथ्यहिन जानकारी फैलनुअघि एरिक्सन होसमा फर्किएको खबर सार्वजनिक भयो। एरिक्सनको स्वास्थ्यलाभको कामना गरिरहेका विश्वभरका खेलाडी र फुटबलप्रेमी दर्शक पुन: उत्साही देखिए। दुर्भाग्यपूर्ण त्यस खेलमा केही विभिन्न उच्च मानवीय मुल्य देखिए।
