श्रीलंकामा भारी वर्षा र हावाहुरीका कारण शनिबार कम्तीमा पनि चार जनाको ज्यान गएको छ।
साथै सो हुरीमा परी सात जना नागरिक हराइरहेका छन्। अहिले पनि वर्षा जारी छ भने हावाहुरी पनि चलिरहेको छ।
श्रीलंकालको मौसम विभागले नागरिकहरुलाई सुरक्षित रहन सूचना जारी गरेको छ। वर्षा र हुरी अरु केही समय कायमै रहने हुनाले घरमै सुरक्षित भएर बस्न सो सूचनामा भनिएको छ।
शनिबार यहाँको विपद् व्यवस्थापन केन्द्रले दिएको जानकारीअनुसार यहाँका कम्तीमा पाँच हजार जनालाई अन्यत्रै सुरक्षित स्थलमा लगिएको छ भने यहाँको सेनाले उद्धारको कामलाई निरन्तरता दिइरहेको छ।
श्रीलंकाका प्राय सबै जिल्ला वर्षा र हुरीबाट प्रभावित भएका छन्। शनिबार यहाँका १ लाख ७८ हजार जना नागरिक नराम्ररी प्रभावित भएका छन्।
हुरी र वर्षाका कारण यहाँका कम्तीमा पनि ६५ ओटा घर भत्किएका छन् भने अरु भौतिक संरचनाहरुमा पनि ठूलो क्षति पुगेको छ।
यहाँका कैयौँ जिल्लामा बाढी आएको छ। बाढीले गर्दा उद्धारका लागि यातायातका साधनहरु लैजान पनि समस्या भएको विपद् व्यवस्थापन केन्द्रले जनाएको छ।
