काठमाडौं : 'भीआइपीका छोराको संलग्नता छ। त्यसैले यो घटनाको अपराधी पत्ता नलागेको हो।'
अपराध कर्ममा जो संलग्न भए पनि आम बुझाइ भने यही हो जसलाई चिर्न पूरै असफल भए रामबहादुर थापा (बादल)। राजनीति गर्नेहरूले पनि बुझेर होस् वा राजनीतिक फाइदाकै लागि, भीआइपीका छोरा भन्दै आरोप लगाइरहे।
एउटा सार्वजनिक कार्यक्रममा विप्लव नेतृत्वको नेपाल कम्युनिस्ट पार्टीका प्रवक्ता खड्गबहादुर विश्वकर्माले नै भनेका थिए, ‘सरकारका मान्छेहरू नै, सरकार चलाइराखेका मान्छेका छोराछोरी नै हत्या र बलात्कारमा संलग्न छन् भन्ने प्रस्ट हुन्छ।'
एउटा बलात्कार र हत्याको घटनालाई लिएर चारैतिर भीआइपी! भिआइपी! मात्र गुञ्जायमान भयो। सबैले औला अरुतिर होइन, देशको गृह प्रशासन सम्हालिरहेका गृहमन्त्री रामबहादुर थापा बादलतिर नै थियो। एउटा मिडियामा त गृहमन्त्रीको छोरा नै संलग्न भएको संदेश दिनेखालको समाचार सार्वजनिक भयो। तर, पछि समाचार हटाइयो - पुष्टि नभएपछि।
घटना अरू कुनै होइन १३ वर्षीय निर्मला पन्त बलात्कार र हत्या प्रकरण नै हो। तीन वर्ष पुग्नै लाग्यो तर निर्मला पन्तको हत्यारा को हो भन्ने अझै खुल्न सकेको छैन। नेपाल प्रहरीका दुई प्रहरी महानिरीक्षक (आइजी) फेरिए। निर्मला प्रकरण जस्ताको त्यस्तै छ।
गृह मन्त्रालयको जिम्मेवारी सम्हालेकाले निर्मला हत्याकाण्ड जतिसक्दो चाँडो सुल्ट्याउनु गृहमन्त्री थापाको जिम्मेवारी नै थियो। त्यसमाथि आफ्नै छोरोको नाम जोडिन थालेकाले त्यो अफवाह चिर्न भए पनि केही गरेर देखाउन सक्थे। निर्मलाको हत्या र बलात्कार कसले गरेको हो प्रष्ट पार्न सकेको भए भ्रमहरु सबै सकिन्थे। तर तीन वर्ष बित्यो अपराधी को? भन्ने खुल्न सकेन। निर्मलालाई न्याय दिने विषयमा कालो बादल मडारिरह्यो।
