काठमाडौं । कोभिड–१९ का कारण गत आर्थिक वर्षको अन्तिम त्रैमासमा कर्जा लगानी हुन नसक्दा बैंक तथा वित्तीय संस्थाले बचतकर्ता मारमा पर्ने गरी ब्याजदर घटाए । चालु आर्थिक वर्षको प्रथम त्रैमास र दोस्रो त्रैमाससम्म पनि ब्याजदर घटाएका बैंकहरु तेस्रो त्रैमास नसकिँदै भने निक्षेप तान्न ब्याजदर बढाउने अवस्थामा पुगेका छन् ।
पुसमध्यसम्म २ खर्बमाथि तरलता रहेको बैंकिङ प्रणालीमा अहिले तरलता संकुचनको अवस्था पुगेको छ । फागुन २५ गतेको तथ्यांकानुसार बैंकिङ प्रणालीमा ३४ अर्ब मात्रै तरलता रहेको नेपाल राष्ट्र बैंकका प्रवक्ता डा. गुणाकर भट्ट बताउँछन् । यसबाहेक ९ अर्ब ५४ करोड राष्ट्र बैंकले प्रशोचन गरेको उनले बताए ।
बैंकिङ प्रणालीमा तरलता कम हुँदै जाँदा ब्याजदर बढ्ने संकेत देखिएको हो । चैतबाटै निक्षेपको ब्याजदर बढ्ने र वैशाखबाट कर्जाको ब्याजदर पनि बढ्ने बैंकर शोभनदेव पन्त बताउँछन् । “आर्थिक गतिविधि बढेको छ । आर्थिक गतिविधि बढेअनुसार कर्जाको माग बढ्यो र सप्लाई सोहीअनुसार हुन सकेन भने ब्याजदर त बढिहाल्छ नि,” उनले बाह्रखरीसँग भने ।
