‘तिम्रो छोरालाई हामीले अपहरण गरेका छौँ। छोरा चाहिए एक करोड रुपैयाँ लिएर आऊ।'
गत अघिल्लो शनिवार धनुषाको नगराइन नगरपालिका–६ बस्ने रमेश दासको परिवारमा कुनै अपरिचित व्यक्तिले फोनबाट यसै भने। शनिवार दिउँसो देखि नै रमेशको सात वर्षीय छोरा घरबाट बेपत्ता थिए। त्यसैले पनि उनीहरू नआत्तिने कुरै भएन। दास परिवारका एक करोड रुपैयाँ जुटाइहाल्ने अवस्था थिएन।
त्यसपछि उनीहरूको एउटै भरोसा बन्यो प्रहरी। उनीहरूले तत्कालै प्रहरीलाई खबर गरे। बालक अपहरण र फिरौती भनेपछि प्रहरीले पननि सक्रियता देखाइहाल्यो। २ नम्बर प्रदेश प्रहरी र जिल्ला प्रहरी कार्यालय धनुषाले अपरेसन सुरु गर्यो। प्रहरीका लागि अपराधी अपहरित बालक खोज्ने पहिलो 'क्लु' त्यही मोबाइल कल थियो।
प्रहरीले ट्र्याक गर्दा मोबाइलको लोकेसन - जनकपुरको माछा बजार देखियो। त्यसैलाई आधार बनाएर पिछा गर्दै प्रहरीले अपरेसन सुरु गर्यो। दुई घण्टाको अवधिमा प्रहरीले बालकलाई उद्धार गर्न पनि सक्यो। प्रहरीले अपहरणको अभियोगमा एकजना युवकलाई नियन्त्रणमा लियो।
पक्राउ पर्नेमा थिए पिपरा गाउँपालिका वडा नम्बर ७ दनौलीका २० वर्षीय लक्ष्मेश्वर। लक्ष्मेश्वर अरू कोही होइनन् अपहरित बालककै मामा रहेछन्। मामाले नै भान्जालाई अपहरण गरेको प्रहरीको अनुसन्धानमा देखियो।
