मोरङको विराटनगर-१०स्थित कोशी अस्पताल कोभिड-१९ उपचार केन्द्र। कोरोना संक्रमित बढेपछि गत चैत २१ गतेबाट कोरोनाका बिरामीका लागि उपचार केन्द्र तोकियो। त्यति बेला बाक्लो चहलपहल देखिन्थ्यो यो क्षेत्रमा।
हिजोआज भने यो केन्द्रमा चरोमुसो देखिन्न। बाहिर सुरक्षागार्ड बस्नका लागि राखिएको मेच खाली देखिन्छ, गेटको दुईतिर राखिएका कोरोनासम्बन्धी चेतनामुलक पोस्टर उल्टोपाल्टो परेका छन्।
फलामे गेट बन्द नै छ। त्यही गेटको बीचमा सेतो कागजमा लेखिएको छ : कोभिड भ्याक्सिन लिन जाने ठाउँ। बायाँपट्टी १० लाख कोभिड-१९ खोप भारतका जनताबाट नेपालका जनतामा उपहार लेखिएको नेपाल भारत मैत्री संघ विराटनगरको चिटिक्कको बोर्ड टाँगिएको छ।
गएको चैत २१ गते पुरानो र पुस ५ गते नयाँ भवन मुख्यमन्त्री शेरधन राईले तामझामका साथ उद्घाटन गरेका थिए। उक्त कोभिड अस्पतालको अवस्था कस्तो छ, पछिल्लो दिन कोरोना संक्रमितको उपचार अवस्था कस्तो छ? यिनै प्रश्न लिएर हामी पुगेका थियौं केन्द्रमा।
गेटमा हामी उभिएको देखेपछि भित्रबाट एक जना आइपुगे। उनी रहेछन् कार्यालय सहयोगी मोहन श्रेष्ठ। दोहोरो परिचयपछि हामी लाग्यौ केन्द्रभित्र।
पुरानो भवनमा करिब एक सय र नयाँमा १०३ गरी दुई सय बढी बेड क्षमता भएको दुई वटा भवन रहेछन्। केन्द्रभित्र पुगेपछि थाहा लाग्यो यहाँ कोरोना संक्रमित बिरामी कोही छैनन्। नयाँ पुरानो दुवै आइसोलेसन वार्ड खाली।
