पर्यटन क्षेत्रले कोरोना भाइरस संक्रमणको मार खेप्न थालेको झन्डै वर्षदिन पुग्न थाल्यो । विश्वव्यापी रुपमा कोरोना भाइरसको त्रास फैलिँदै गर्दा सुरुमा पोखरेली पर्यटन व्यवसायीले संक्रमणको असर बढीमा एकवर्षसम्म रहिरहने आँकलन गरेका थिए । त्यही अनुसार व्यवसाय धान्ने उनीहरुको योजना थियो ।
भाईरस संक्रमणका कारण आर्थिक रुपमा धरासायी बनेको पर्यटन व्यवसाय टिकाईराख्न सकस भएको भन्दै व्यवसायीले कर्जाको साँवा र ब्याज तिर्ने अवधि बढाईदिन सरकारसँग सुरुमै आग्रह पनि गरेका थिए । पर्यटन व्यवसायीले आर्थिक वर्ष २०७७÷७८ को मौद्रिक नीतिमार्फत ऋणको साँवा र ब्याज तिर्ने समय कम्तिमा ६ महिना बढाईदिनुपर्ने माग त्यो बेला गरेका थिए । तर, नेपाल राष्ट्र बैंकले मौद्रिक नीति सार्वजनिक गर्दै किस्ताको अवधि एकवर्षका लागि थपिदिएको थियो ।
कोरोनाको मारमा परेको भन्दै पर्यटन व्यवसायीले त्यो बेला सबैभन्दा बढी जोडतोडका साथ उठाएको विषय थियो–पूर्नकर्जा, ऋणको साँवा–ब्याज तिर्ने समय थपिनुपर्ने, कर्जा पुर्नसंरचना तथा पूनर्तालिकीकरण हुनुपर्ने । व्यवसायीका यिनै मागलाई सम्बोधन हुनेगरि मौद्रिक नीतिमा उल्लेख गरिदिँदा व्यवसायी हौसिएका पनि थिए । तर, मौद्रिक नीतिले थपिदिएको समयमा पनि ऋणको साँवा र ब्याज तिर्न सक्ने अवस्था नभएको भन्दै समय थपिदिन व्यवसायीले पुनः आग्रह गरेका छन् ।
