कोरोना माहामारीको समयमा लमही नगरपालिकाका स्वास्थ्य शाखा प्रमुख लोकराज पौडेल बेलुका घर फर्किँदा छिमेकीले कोरोनासाथ ल्याए झै शंका गर्थे।
क्वारेन्टिनको व्यवस्थापनमा खट्ने पौडेलले गाउँमा कोरोना ल्याउने भन्दै हल्ला चल्थ्यो । कोरोना भाइरस रोकथाममा सकृय पौडेल शुक्रबार भने ढुक्क थिए । कोरोना भाइरस विरुद्ध खोप लगाउन पाउदा उनी खुसी थिए । ‘कोरोना भाइरससँग जुध्दा सधैँ डर हुन्थ्यो । चाँडै खोप लगाउन पाउँदा खुसी छु’ उनले भने– ‘सुरुका दिनमा खुबै हल्लाहरु चले । काम गर्न गाह्रो पनि थियो । सबै बाधा व्यवधानहरु पार गर्दै यहाँ सम्म आइयो ।’
लमही अस्पतालका निमित्त मेडिकल सुपरिटेण्डेन्ट डाक्टर आकाश बेल्वासे आइशोलेसन वार्डमा समेट खटिए । जोखिमको बीचमा पनि बिरामीलाई उपचार सेवा दिन खटेका बेल्वासेले लमहीमा पहिलो खोप लगाए ।
‘सबैलाई ढुक्क पार्न म आफैले पहिलो खोप लिए । यो खोप पूर्णरुपमा सुरक्षित छ’ उनले भने – ‘सरकारले यती चाँडै खोप ल्याउला र लगाउन पाउला भन्ने सोचेकै थिएनौँ। तर, आज लगाउन पाइयो ।’
