काठमाडौं : 'शीर्ष नेताहरू कुरा मिल्दा सँगै बसेर रक्सी खान्छन्। हाम्रा अगाडि चाहिँ झगडा गरेको जस्तो गर्छन्।'
२०७४ सालको प्रदेशसभा निर्वाचनको अभियानमा मनाङमा खटिँदा उनले दिएको अभिव्यक्ति हो यो। चुनावी अभियानमा जुट्दा उनलाई निर्वाचनमा होमिएको गुन्डा भन्दिन्थे मान्छेहरु। उनी आफैँ पनि पटक पटक सुन्थे - गुन्डा नाइके पनि निर्वाचनमा भन्ने। यस्तो अभिव्यक्ति आएपछि प्रतिकार गर्थे - कुनै देशमा गुन्डाले चुनाव लडेको देख्नु भएको छ? चुनाव लडेपछि के गुन्डा?
चुनावमा प्रतिस्पर्धा मात्र गरेनन् उनले। जित पनि निकाले। नेकपाले उनका लागि आफ्ना उम्मेदवार फिर्ता लिएर मैदान खाली गरेको थियो। त्यसपछि भने उनको पहिचान फेरियो र भए प्रदेश सांसद। उनलाई तपाईँले चिनिहाल्नुभयो होला। हो, उनी राजीव गुरुङ उर्फ दीपक मनाङ्गे नै हुन्। कुनै समय काठमाडौँका गल्लीमा गुन्डाको नाइकेको छवि बनाएका दीपक मनाङ्गेको भूमिका अहिले पूरै फेरिएको छ। उनलाई बदनाम गराउने ट्याग क्रमश धमिलो हुँदै गएको छ। र, उनको छातीमा टाँसिएको छ प्रदेश सांसदको लोगो।
कुनै समय थियो प्रहरीले उनलाई समात्नुलाई चर्चित सफलताका रुपमा व्याख्या हुन्थ्यो। चर्चामा अहिले पनि छन् उनी तर फरक हिसाबको। मनाङ जिल्ला निर्वाचन क्षेत्र (ख) बाट निर्वाचित स्वतन्त्र प्रदेशसभा सदस्य दीपक नेपाल कम्युनिस्ट पार्टी(नेकपा)मा प्रवेश गरेका थिए, जितपछि। तर, अहिले भने फेरि आफूलाई स्वतन्त्र सांसद भन्न थालेका छन्।
'म अहिले पनि स्वतन्त्र सांसद नै हुँ। त्यतिखेर बहुमत पुर्याउनका लागि नेकपालाई सहयोगमात्र गरेको हुँ,' प्रदेशसभा सांसद दीपक मनाङ्गेले भने।
नेपाल कम्युनिस्ट पार्टी अहिले दुई धारमा विभाजित भएपछि उनलाई स्वतन्त्र हुन थप सहज भएको छ। प्रतिनिधिसभा विघटन गरेपछि प्रधानमन्त्री समेत रहेका केपी शर्मा ओलीको अध्यक्षतामा एउटा गुट र पुष्पकलम दाहाल प्रचण्ड - माधवकुमार नेपालको अध्यक्षता अर्को गुट सक्रिय छ। पार्टीको नाम र सूर्य चिन्ह कसको भन्नेमा लफडा जारी नै छ। यस्तोमा मनाङ्गे भने पार्टी एक होस् भन्ने नै चाहन्छन्। बहुमत ल्याएको दलको चर्तिकलाले आफू चकित भएको बताउँछन् उनी।
