प्रदेश २ सामाजिक विकास मन्त्रालयले छात्रवृति सम्बन्धि कार्यविधि नबनाउदा रकम फ्रिज हुँदै गएको छ ।
प्रदेश सरकारको आव ०७६/७७ को बजेट वक्तव्यमा सामुदायिक विद्यालयमा कक्षा १ देखि ८ सम्म अध्ययनरत विपन्न, दलित र मुस्लिम छात्राहरूका लागि मासिक पाँच सयका दरले छात्रवृत्ति दिइने उल्लेख थियो ।
तर स्पष्ट कार्यविधि नबन्दा चालू आर्थिक वर्ष ०७७÷७८ मा पनि करोडौँ रकम फ्रिज हुने भएको छ ।
संघीय सरकारको विशेष अनुदान सहायताबाट सञ्चालन हुने यो कार्यक्रमका लागि ४८ करोड रुपैयाँ विनियोजन गरिएको थियो ।
तर, निर्देशिका नै नबन्दा कार्यक्रम कार्यान्वयनमा आएको छैन ।
गत आर्थिक वर्षमा उच्च शिक्षा अध्ययनरत दलित, मुस्लिम र छात्राका लागि दुई करोड रुपैयाँ विनियोजन गरिएपनि सबै रकम फ्रिज भएर गयो ।
सामाजिक विकास मन्त्रालयअन्तर्गत शिक्षा विकास निर्देशनालयले चालू आवमा उच्च शिक्षा अध्ययनरत अति विपन्न, दलित, मुस्लिम र जेहेनदार विद्यार्थीका लागि विनियोजित एक करोड रुपैयाँ पनि फ्रिज हुने भएको छ ।
गत आवमा पनि सोही शीर्षकको एक करोड रुपैयाँ कार्यविधि अभावकै कारण फ्रिज भएको थियो ।
