यज्ञराज जोशी
सामान्य गरिब परिवारका फुच्चे पाख्रिन सर्लाहीको हरिवनस्थित हाटबजारमा साहुका खसीबोका झारेर घर फर्कदै थिए। माइक्रो चढ्नका लागि हरिवन बजारको बाटो काट्नै लाग्दा शनिबार एउटा झण्डावाल गाडीको ठक्करबाट उनी सडकमै बजारिए।
गाडीको ठक्करबाट ३–४ मिटर हुत्तिएका उनी सडक किनारतिर परेर भाग्यले बाचेको प्रत्यक्षदर्शी प्रज्वल ढुंगाना बताउँछन्।
‘बीच बाटोमा गाडीको ठक्करपछि उहाँ उछिट्टिनुभयो र सडक किनारतर्फ लड्नुभयो। सडकतिर लडेको भए अर्कै घटना हुनसक्थ्यो। कोही नभएको ठाउँमा उछिट्टिएर भाग्यले जोगिनुभयो,’ ढुंगानाले नेपालखबरसँग भने, ‘हान्ने गाडी केही स्लो भयो। दुई सेकेन्डजति रोक्यो तर कोहीपनि मान्छे झरेनन् र गाडी सरासर हिड्यो।’
स्थानीय चर्तुरभुजेश्वर बहुमुखी क्याम्पसको स्ववियू सभापति समेत रहेका ढुंगाना तुरुन्तै दुर्घटनास्थल पुगेका थिए। तर दुर्घटनालगत्तै गाडी कुदिसकेकोले त्यसमा सवार को थिए भन्ने थाहा पाउन नसकेपछि उनले गाडीको नम्बर (ना १ झ ३८४२) भने टिप्न भ्याए।
