गत साताको सुरुवातमा, ओम अस्पतालमा १५ वर्षीय किशोर भर्ना भए। ज्वरो आएको ४ दिन पछि उनलाई अस्पताल ल्याइएको थियो। उनका आँखा र ओठ राता भएका थिए। अड्न नसक्ने गरी गलेका थिए उनी। बिस्तारै उनको स्वास प्रस्वासमा पनि समस्या देखियो। र, मुटुको समस्याका लक्षणहरू पनि देखिए।
अक्सिजन लगाउँदा पनि स्वास्थ्यमा सुधार नदेखिएपछि सास नलीमा पाइप राखेर भेन्टिलेटरको सहारा दिनुपर्यो उनलाई। स्वास्थ्य स्थिति एकदमै चाँडो बिग्रदो थियो। त्यसमाथि रोग पहिचान नहुनुले परिवारका साथै डाक्टरहरूमा तनाव थपेको थियो। किनकि उनको कोभिड-१९ सहित अन्य संक्रमण परीक्षणको रिपोर्ट नेगेटिभ आइसकेको थियो। कुनै पनि एन्टिबायोटिकले काम गरिरहेको थिएन।
फोक्सोको सिटी स्क्यान गर्दा उनमा निमोनिया देखियो। जाँच गर्दा मुटुको आकार पनि साविकभन्दा ठूलो देखायो। संक्रामक रोग विशेषज्ञले किशोरमा देखिएको समस्या संक्रामक रोग सम्बन्धित नभएको बताए।
त्यसपछि ओम अस्पतालका बाथजन्य रोगका डाक्टरले ‘भास्कुलाइटिस’ भएको अनुमान गरे। लगत्तै किशोरबारे जानकारी दिँदै डाक्टर धर्मागत् भट्टराईलाई अस्पतालले डाक्यो। भट्टराई बाल रोग प्रतिरोध तथा बाथजन्य रोग विशेषज्ञ (इम्यूनोलोजिस्ट एवं र्यूमाटोलोजिस्ट) हुन्।
