आगामी बिहीबार कोरोना महामारीको १ वर्ष पुग्दै छ। गत वर्षको ३१ डिसेम्बरमा चीनको वुहान म्युनिसिपल हेल्थ कमिसनले वुहानमा निमोनियाका केसहरू देखिएको तथ्य पहिलो पटक सार्वजनिक गरेको थियो। अन्ततः ती केसहरू नोवल कोरोना भाइरस भएको प्रमाणित भयो। त्यसो त गत वर्षकै नोभेम्बर १७ मा हुवेई प्रान्तका एक ५५ वर्षीय व्यक्तिलाई कोभिड–१९ को पहिलो बिरामी रहेको पनि मानिँदै आएको छ। यो महामारी ठ्याक्कै कुन ठाउँबाट सुरु भयो भन्नेमा अझै पनि एकिन हुन सकेको छैन।
चीनको सरकारी समाचार माध्यम पिपुल्स डेलीले १ महिनाअघि आफ्नो फेसबुक पेजमा भनेको छ, ‘उपलब्ध सबै प्रमाणले वुहानबाट भाइरस सुरु भएको देखाउँदैनन्।’ यही गुत्थी सुल्झाउन विश्व स्वास्थ्य संगठनले चीनसँग मिलेर आउँदो जनवरीमा यस विषयमा बृहत् अध्ययन गर्दै छ।
चीनबाट फैलिएको यो संक्रामक रोगको लपेटामा विश्वका २ सय २० देश परेका छन्। २१औं शताब्दीको पहिलो चौथाइमा सुरु भएको यो महामारीले आइतबारसम्म विश्वका ८ करोडभन्दा बढी मानिसलाई संक्रमित बनाइसकेको छ भने १७ लाख ६६ हजार जनाको मृत्यु भएको छ। जनस्वास्थ्य मात्र होइन, यो अवधिमा यो संक्रामक भाइरसले एकापसमा जोडिएको विश्वको आर्थिक तथा सामाजिक जीवनलाई पुरै गिथोलेको छ। दोस्रो विश्व युद्धपछि समाचार माध्यममा सबैभन्दा बढी छाएको विषय बनेको छ, कोभिड–१९।
