सप्तरीमा माछा मार्ने विषयमा विवादपछि दुई समुहबीच झडप हुँदा एक महिलाको मृत्यु हुनुको साथै अन्य ४ जना घाइते भएका छन्।
जिल्लाको बोदे बर्साइन नगरपालिका ३ कसमार टोलमा सार्वजनिक पोखरीमा झडप भएको प्रहरीले जनाएको छ।
झडपमा परी रामपृत मण्डलकी ३५ वर्षीया श्रीमति गंगीयादेवीको मृत्यु भएको प्रहरी जिल्ला प्रहरी कार्यालय सप्तरीको प्रहरी प्रवक्ता भुवनेश्वर साहले जानकारी दिए।
झडपको क्रममा गंगियादेवी माथि लाठी, बाँसको भाटाले प्रहार गर्दा उनको घटनास्थलमै मृत्यु भएको प्रहरी प्रवक्ता साहले बताए।
यसैगरी झडपमा परी ५५ वर्षीय जयनारायण मण्डल, ३५ वर्षीय सोबिन्द्र मण्डल, १८ वर्षीय धिरज मण्डल र ४५ वर्षीय जोगिन्द्र मण्डल घाइते भएका छन्।
घाइते भएका सबैलाई टाउकोमा चोट लागेको छ। उक्त घटनामा संलग्न रहेका अर्का पक्षका ५० वर्षीय शिवसरन मण्डल ४७ वर्षीय विजय मण्डल, २२ वर्षीय सुरेन्द्र मण्डल र २८ वर्षीय राबित मण्डललाई नियन्त्रणमा लिएको जिल्ल्ला प्रहरी कार्यालय सप्तरीले जानाएको छ।
घटनामा संलग्न अन्य व्यक्तिहरुको खोजतलास कार्य भइरहेको प्रहरी प्रवक्ता साहले बताउदै थप अनुसन्धान जारी रहेको जानकारी दिए।
.jpg)
