नेटफ्लिक्स (अनलाइनमार्फत विश्वभरका दर्शकसामु सिनेमाहरू उपलब्ध गराउने वेबसाइट) मा ‘द क्राउन’ नामक एउटा वेब सिरिज छ । दर्शक र समीक्षकहरूले निकै मन पराएको यो सिरिजमा बेलायतकी महारानी एलिजावेथ द्वितीय, बकिङघम प्यालेस र त्यसबेलाको बेलायतको राजनीतिलाई निकै आकर्षक ढंगले देखाइएको छ । इतिहासकारहरूले चौथो सिरिजमा केही काल्पनिक कुरा देखाइएको भए तापनि अन्य भाग यथार्थको नजिक रहेको टिप्पणी गरेका छन् । बेलायत, रानी एलिजावेथ द्वितीय, उनको परिवार र तत्कालीन बेलायती राजनीतिबारे बुझ्न यो सिनेमा निकै उपयोगी छ ।
महामारी र प्रकोपको समयमा सरकार अभिभावकका रूपमा प्रस्तुत हुनुपर्ने सर्वमान्य सिद्धान्त विपरित सरकार करिब करिब पीडकका रूपमा प्रस्तुत भएको छ । जिम्मेवारीको पूर्णतः अभाव छ ।
यो सिनेमाको तेस्रो सिजनको तेस्रो एपिसोडमा सन् १९६६ मा वेल्सको कोइला खानीको दुर्घटना देखाइएको छ । ११६ बालबालिकासहित १४४ जनाको ज्यान लिएको उक्त दुर्घटनापश्चात ह्यारोल्ड विल्सनको नेतृत्वमा रहेको लेबर पार्टीको सरकार मात्र होइन, महारानी एलिजाबेथको पनि निकै आलोचना भयो । टार्न सकिने दुर्घटनालाई पनि टार्न नसकेको भनेर सरकारको आलोचना भएको थियो भने पीडितप्रति सहानुभूति प्रकट गर्न कञ्जुस्याइँ गरेका कारण महारानीको आलोचना भएको थियो ।
सिनेमामा एउटा रोचक सम्वाद प्रस्तुत गरिएको छ । ह्यारोल्ड विल्सनले महारानीलाई दुर्घटनाबारे जानकारी गराउँछन् र तुरुन्त दुर्घटनास्थल पुगेर पीडितलाई सहानूभूति दिनुपर्ने सल्लाह दिन्छन् । तर महारानीले उक्त सल्लाह अस्वीकार गर्छिन् । महारानीको विचार राजपरिवारका सदस्य दुर्घटनास्थलमा जाने होइन, उनीहरू आवश्यक परे अस्पतालमा भेट्न जाने हो भन्ने हुन्छ ।
