बुटवल । गत असोज २० गते प्रदेशसभा बैठकले लुम्बिनी प्रदेशको स्थायी राजधानी दाङ बनाउने निर्णय गरे पनि तत्काल राजधानी नसर्ने भएको छ । लुम्बिनी प्रदेश सरकारले स्थायी राजधानी दाङ सार्नका लागि प्रक्रिया सुरु गरे पनि धेरै काम बाँकी रहेका कारण तत्काल अस्थायी राजधानी बुटवलबाटै प्रशासनिक काम हुने भएको हो ।
प्रदेश सरकारले दाङस्थित राजधानी राख्ने क्षेत्रमा जग्गा प्राप्तिका लागि संघीय सरकारलाई पत्राचार गरेको छ । यस अतिरिक्त प्रदेश पूर्वधार प्राधिकरणको एक युनिट खडा गरिएको छ भने राप्ती प्राविधिक शिक्षालयको भवनमा प्रदेश पूर्वाधार प्राधिकरणको कार्यालय स्थापना गरिएको छ ।
सरकारले राजधानी दाङमा सार्नका लागि प्रक्रिया अगाडि बढाएको सरकारका प्रवक्ता एवं भौतिक पूर्वाधार विकासमन्त्री बैजनाथ चौधरीले रातोपाटीलाई बताए । उनले राप्ती प्राविधिक शिक्षालयको नाममा रहेको जग्गा प्रदेश सरकारको नाममा नामसारी गरीदिन संघीय सरकारलाई पत्राचार गरेको जानकारी दिए । त्यसको लागि राप्ती गाउँपालिका र प्रमुख जिल्ला अधिकारीलाई पनि जिम्मा दिइएको उनको भनाइ छ ।
