गत साउन १६ गते निक्षेप डुबेकालाई रकम फिर्ता लिनका लागि दाबी गर्न ओरेयण्टल सहकारीका सञ्चालक सुधीर बस्नेतको नाममा एक सूचना जारी भयो । सूचनामा रकम फिर्ता लिनका लागि दावी पेश गर्न साउन २९ देखि लागू हुनेगरी ६० दिनको समय दिइएको थियो ।
तर, निक्षेप फिर्ता दिनका लागि न उसले कुनै सम्पर्क कार्यालयको ठेगाना दियो न त नम्बर नै । बरु एउटा वेभसाइट खडा गरेर अनलाइन मार्फत दाबी गर्न भन्यो । कतिपय निक्षेपकर्ता अनलाइनमार्फत निक्षेप दाबी गर्न नसक्ने अवस्थाका थिए । केहीले दाबी गरेपनि त्यहाँबाट फिर्ता लिन बोलावट आएन ।
२०७४ सालमा ‘समस्याग्रस्त’ सहकारी भन्दै समस्याग्रस्त सहकारी व्यवस्थापन समितिले सो सहकारीलाई आफ्नो निगरानीमा राखेको थियो । तर, आजैको मिति (असोज २५) देखि ओरेयण्टल सहकारीलाई समस्याग्रस्त सहकारी व्यवस्थापन समितिले निगरानी स्थगित गरेको छ । समितिले एक सूचना जारी गर्दै ओयिरयन्टल सहकारीको कामकारबाही अर्को व्यवस्था नभएसम्मका लागि स्थगित गरिएको जनाएको छ ।
समितिका अध्यक्ष कुमार पोखरेलका अनुसार ओरेयण्टलको सम्पति भन्दा दायित्व बढी छ । उसको दायित्व १६ अर्ब १ करोड ४५ लाख छ तर समितिले रोक्का राखेको उसको सम्पत्ति करिब ५ करोड रहेको मूल्याङ्कन छ ।
