माधव बस्नेत
सर्वोच्च अदालतका प्रवक्ता भद्रकाली पोखरेललाई रातोपाटी प्रतिनिधिले असोज ७ गते दिउँसो २ः४१ साँझ ५ः४० र ५ः४१ मा तीन पटक फोन गरेको थियो ।
मन्त्रिपरिषदको सिफारिसमा राष्ट्रपति विद्यादेवी भण्डारीले नेकपाका उपाध्यक्ष वामदेव गौतमलाई राष्ट्रिय सभामा गरेको मनोनयन गैरकानुनी भएको भन्दै वरिष्ठ अधिवक्ता दिनेश त्रिपाठीले असोज ६ गते सर्वोच्च अदालतमा रिट हालेका थिए । ७ गते न्यायाधीश आनन्दमोहन भट्टराईको इजलासमा त्यस रिटको सुनुवाई हुँदै थियो । गौतमविरुद्धको मुद्दामा के आदेश भयो भनेर बुझ्नका लागि सर्वोच्च अदालतका प्रवक्ता पोखरेललाई फोन गर्नुपरेको थियो । तर, पटक–पटक फोन गर्दा पनि उनले उठाएनन् ।
त्यसअघि रिट शाखाले सर्वोच्च अदालत नियमावली २०७४ मा किटान गरेकोभन्दा बढी शुल्क लिइरहेकोबारे प्रतिक्रिया लिन पाँच पटकसम्म प्रयास गर्दासमेत प्रवक्ता पोखरेलले फोन उठाएका थिएनन् । छैटौं पटकमात्र उनले फोन उठाएर छोटो प्रतिक्रिया दिएका थिए ।
