भारतीय टीभीमा लोकप्रिय रियालिटी शो ‘बिग बोस’को नयाँ सिजन सुरु हुन लागेको छ। जसका लागि बलिउडका स्टार सलमान खान नै प्रस्तोता रहने भएका छन्। कार्यक्रमको प्रोमोहरू छायाँकन भइसकेको छ।
निर्माताले कार्यक्रमका लागि सलमानलाई हरेक एपिसोड बराबर १० करोड २५ लाख अर्थात् कुल २ सय करोड ५० लाख रुपैयाँ पारिश्रमिक दिने भएका छन्।
बलिउड हंगामाले जनाए अनुसार यो सर्वाधिक पारिश्रमिक हो। ‘बिग बोस’ छायाँकनका लागि सलमानले ३ महिनाभर सातामा एक दिन दिनेछन्।
सेप्टेम्बरदेखि नै प्रसारण हुने भनेको कार्यक्रम छायाँकनमा ढिलाइ भएको छ। मुम्बईस्थित फिल्म सिटीमा बिगबोसको घर निर्माण मनसुनका कारण प्रभावित छ। अक्टोबरदेखि कार्यक्रम प्रसारण हुनेछ।
यस वर्ष कार्यक्रममा १६ सहभागी रहने छन्। तीमध्ये १३ जना सेलिब्रेटी हुन् भने ३ जना सर्वसाधारण। उनीहरु सबै एउटै घरमा बस्ने छन्।
सहभागीहरु ‘बिग बोस’को घरमा प्रवेश गर्नुअघि उनीहरुको कोरोना भाइरस परीक्षण गरिने छ। कोरोना भाइरस संक्रमण नियन्त्रण र रोकथामका लागि कार्यक्रमका केही नियम तथा निर्देशिका परिवर्तन गरिएको जनाइएको छ।
