यज्ञराज जोशी
अघिल्लो हप्ता भरतपुर सेन्ट्रल हस्पिटलमा कार्यरत् एक नर्सलाई कोरोनाभाइरसको संक्रमण पुष्टि भयो। उनी उपचारमा संलग्न रहेका एक बिरामीमा संक्रमण देखिएपछि कन्ट्याक्ट ट्रेसिङका क्रममा उनीमा पनि संक्रमण पुष्टि भएको थियो।
फ्रन्टलाइन (अग्रपंक्ति)मा खटिएर काम गरेकी उनी आफू संक्रमित भएपछि सामाजले उनको परिवारप्रति गरेको व्यवहारले ठूलो मानसिक तनाव भएको उनी बताउँछिन।
‘संक्रमित भएपछि म छुट्टै अस्पतालको आइसोलेसनमा उपचाररत् थिए। तर, मानिसहरुले संक्रमितको घर भन्दै डोरी, पोस्टर किन नटासेको भन्ने, प्रहरीलाई पठाउने जस्तो कार्य गरेर परिवारलाई एकदमै धेरै मानसिक तनाव दिए,’ उनले दुखेसो पोखिन्, ‘मलाई पो पोजिटिभ देखिएको हो। मेरो परिवारलाई त हैन नी? किन कोरोना लाग्यो भन्दैमा हाम्रो सामाजले अमानवीय व्यवहार देखाएको?’
