स्थान : कोभिड १९ युनिफाइड अस्पताल, बलम्बु
समय : मध्यान्ह करिब १२ः३०
कोरोना भाइरस (कोभिड–१९) को संक्रमण भएकाहरुलाई राखेको सी–१ ब्लकका एक पुरुष फटाफट सिँढी चढेर तीन तले बिल्डिङको छतमा पुगे । र, दक्षिणतर्फ रहेको आईसीयू कक्ष परिसरलाई नियाल्न थाले ।
सुरक्षाकर्मीको एउटा टोली आईसीयू कक्षमा मृत्यु भएका एक पुरुषको शव निकाल्ने तरखरमा थिए । त्यो दृश्य देख्दासाथ छतमा रहेका ४१ वर्षीय पुरुषका आँखाबाट बरर आँसु खस्न थाल्यो । उनी आँसु पुछिरहे र एकटलले आईसीयू कक्षतिर हेरिरहे । एकजना प्रत्यक्षदर्शी भन्छन्, ‘त्यो दृश्य निकै कारुणिक थियो ।’
आईसीयू कक्षबाट शवलाई ग्राउण्डमा निकालियो । शव ढाक्न प्रयोग भएको सबै कपडा निकायो, शव व्यवस्थापन टोलीले डिस्इन्फेक्सन गर्यो । बुबाको शवलाई शव व्यवस्थापन टोलीले शवबाहनमा राखेर अघि बढिरहेको दृश्य नियालिरहेँ । तर मैले केही गर्न सकिन । र, शवबाहनमा राखेर पशुपति आर्यघाटतिर लगे ।
छतमा रोइरहेका युवकले सबै हेरिरहे ।
मृतक काठमाडौं महानगरपालिका–२१ ओमबहाल घर भएका ६७ वर्षीय वृद्ध थिए भने छतमा रोइरहेका पुरुष उनका छोरा रहेछन् । भन्छन्, ‘अस्पताल परिसरमै भएर पनि म बुबाको नजिक जान पाइन ।’
