अमिताभ बच्चनले ‘कौन बनेगा करोडपति’को सुटिङ सुरु गरेका छन्। सामाजिक सञ्जाल इन्स्टाग्राममा तस्बिर सेयर गर्दै उनले आगामी सिजनको केबीसीको सुटिङ थालेको जानकारी दिएका हुन्।
उनले लेखेका छन्, ‘काममा फेरि फर्क्यौं। निलो पीपीई, केबीसी १२। सुरु भएको थियो २००० मा र अहिलेको वर्ष २०२०। २० वर्ष!’
उनले सार्वजनिक गरेको तस्बिरमा सबैजना निलो रंगको पीपीईमा देखिन्छन्। अमिताभले आफ्नो पछिल्लो ब्लगमा सतर्कता अपनाएर केबीसीको सुटिङमा जाने उल्लेख गरेका थिए। जुलाईमा उनलाई कोरोना पोजेटिभ देखिएको थियो। मुम्बईको नानावती अस्पतालमा २० दिन बिताएपछि उनी घर फर्के।
यो वर्ष अमिताभको लागि केही खास छ। केबीसीमा कार्यक्रम प्रस्तोता बनेको यो वर्ष २० वर्ष भयो। ब्रिटिस सो ‘हु वान्टसस टु वी बिलिनियर’को भारतीय फ्रेन्चाइज केबीसीको पहिलो सिजन सुन् २०००–२००१ मा प्रसारणमा आएको थियो।
