सरकारले राम्रो काम गरेको छ भनेर प्रतिपक्षीले भन्दैनः नेकपा नेता नेम्वाङ
काठमाडौं । मुलुक कोरोना भाइरस (कोभिड– १९) को महामारीले हायलकाल हुँदै गएको छ । चार महिना लामो लकडाउनलाई सरकारले केही साता अघि खुकुलो तुल्यायो तर कोरोना संक्रमण बढ्दै गएका कारण देशको ५० प्रतिशतभन्दा बढी जिल्लामा निषेधाज्ञा जारी गर्नुपरेको छ ।
कोरोना संक्रमण नियन्त्रणमा सरकारको भूमिका कमजोर भएको भन्दै प्रमुख प्रतिपक्ष दल नेपाली काँग्रेसले लगातार ध्यानाकर्षण गराउँदै आएको छ । सरकारलाई बारम्बार ध्यानाकर्षण गराइए पनि बेवास्ता गर्दै आएका कारण स्थिति भयावह बन्दै गएको काँग्रेस नेताहरु बताउँछन् ।
पछिल्लो समय काँग्रेस प्रवक्ता विश्वप्रकाश शर्माले पार्टीका तर्फबाट जारी गर्ने प्रेस विज्ञप्तिमा होस् या आफ्नो ट्वीटरमा, उनले सरकारमाथि प्रश्नको ओइरो गर्न थालेका छन् । यिनै प्रश्नका ओइरोबीच सञ्चारमाध्यममा साझा ‘हेडलाइन’ नै बन्न थालिसकेको छ, ‘सरकारलाई काँग्रेसको प्रश्न’ ।
भदौ ३ गते प्रवक्ता शर्माले प्रेस विज्ञप्तिमार्फत प्रधानमन्त्रीलाई प्रश्न गरे, प्रेस काउन्सिललाई स्वायत्त रहन दिने कि गुटगत प्रचार कोटरी बनाएरै छाड्ने प्रधानमन्त्रीज्यू ?
साउन ३१ गते उनले प्रेस विज्ञप्तिमार्फत सरकारलाई सोधे– राज्यको व्यस्तता कि राज्यको बेवास्ता ? जनताको गुहारपछि सुरक्षित ठाउँमा नसारेर भएको मृत्युमा पहिरोमात्र दोषी कि सरकार जिम्मेवार ?
साउन ७ गते उनले लकडाउनबारे सरकारलाई प्रश्न गरे । उनले सोधेका थिए– लकडाउन र खुला, हिजो गल्ती कि आज ?
