'मलाई जीवनमा केही पछुतो छैन। जसले तपाईँलाई मार्दैन त्यसले बलियो बनाउँछ। कयौँ राम्रो कुरा भए, जहाँ एउटालाई छान्न कठिन थियो। आरोह अवरोहको यो मेरो यात्रा हो।'
भारतीय क्रिकेट टिमका पूर्वकप्तान महेन्द्रसिंह धोनीले छोटो फर्म्याटको कप्तानी पाएपछि भनेका थिए। उनै धोनीले शनिबार अन्तर्राष्ट्रिय क्रिकेटबाट सन्यास लिएका छन्।
+++
एउटा सानो बच्चा जसले आफ्नो गोलकिपिङको कौशल देखाएर क्रिकेटमा आएको थियो त्यही बच्चा महेन्द्रसिंह धोनी 'माही' पछि आएर आफ्नो गृहनगर राँची र देशकै गौरव बन्न सफल भयो। त्यतिमात्र होइन धोनी आफ्नो करिअरमा विश्वको शीर्ष क्रिकेटरमध्येमा पर्न सफल पनि भए।
३९ वर्षीय धोनीले सन्यास लिँदै गर्दा उनको खेल करिअरलाई सम्झनुपर्ने हुन्छ।
१८ वर्षमा रणजी ट्रफीमा ड्रेब्यू
धोनीको क्रिकेट करिअर तब सुरु भयो जब उनले बिहारको तर्फबाट सन् १९९९/२००० मा रणजी ट्रफीमा डेब्यू गरे। त्यतिबेला उनको उमेर थियो १८ वर्ष। ५ म्याचमा २८३ रन जोड्दै उनले उक्त सिजन सकेका थिए। अर्को सिजनमा उनले बिहारबाट बंगालविरुद्ध मेडन फस्टक्लास सेञ्चुरी हाने।
अर्को सिजनबाट उनी खडकपुर रेल्वे स्टेसनमा ट्राभलर टिकट एक्जामिनर (टीटीई) को जागिर खान थाले। त्यहाँ उनले सन् २००३ सम्म काम गरे।
