जनकपुरधाममा एक साताका लागि निषेधाज्ञा जारी गरिएको छ। जिल्ला प्रशासन कार्यालय धनुषाले भोली सोमबार रातीदेखि एकसातासम्मका लागि निषेधाज्ञा जारी गरेको हो।
निषेधाज्ञा सोमबार राती १२ बजेदेखि लागू हुने प्रमुख जिल्ला अधिकारी प्रेमप्रसाद भट्टराईले बताए।
‘कोरोना संक्रमणको प्रभावकारी रोकथाम तथा नियन्त्रण र यसको संक्रमण फैलिन नदिनका लागि जिल्लाभर प्रतिकूल प्रभाव पर्नसक्ने कुनै किसिमको गतिविधि हुन र गर्न नदिन नेपाल राजपत्रमा तोकिएको अत्यावश्यक सेवाहरु बाहेकका अन्य सबै सेवा र स्थलहरु सोमबार राती १२ बजेदेखि एक हप्तासम्मका लागि बन्द हुनेछ,’ उनले भने।
जनकपुरधाम उपमहानगर क्षेत्रमा कोरोनाको जोखिम बढ्दै गएकाले कडाई गरिने उनले बताए। उनले तोकिएका बाहेक कोहीपनि बाहिर निस्कन नपाउने जानकारी दिए।
प्रशासनले औषधि पसल, खाद्यान्न, फलफूल–तरकारी, अस्पताल तथा स्वास्थ्य केन्द्र सञ्चालनसम्बन्धी सेवा, मालसामान ओसारपसार तथा निर्माण कार्यमा प्रयोग हुने ढुवानीका यातायात, सरकारी छापाखाना, सञ्चार सेवा, बैंकिङ सेवा, आन्तरिक सुरक्षा कार्य, खानेपानी सञ्चालन तथा वितरण, पेट्रोलियम पदार्थको ढुवानी भण्डारण र वितरण, फोहोरमैला संकलन तथा ढुवानी, विद्युत सेवा, कृषिजन्य कार्य तथा कृषि तथा पशुपंक्षीजन्य उत्पादन, ढुवानीमा प्रयोग हुने साधन, वर्कशपलाई अत्यावश्यक सेवा उल्लेख गरेको छ।
