बलिउडका सर्वाधिक कमाई गर्ने नायक अक्षय कुमार अब नयाँ चलचित्र ‘बेलबटम’को छायांकनका लागि अगष्ट महिनामा लण्डन जाने तयारीमा छन्।
यो चलचित्रको छायांकन सकेर भारत फर्किएपछि उनले चलचित्र ‘अतरंगी रे’को छायांकनका लागि समय दिनेछन्।
धनुष र नायिका साराअली खानको मुख्य भूमिका रहने चलचित्रमा अक्षयको विशेष भूमिका छ। यो चलचित्रका लागि अक्षयले २ हप्ताको समय दिनेछन्।
आनन्द एल रायको निर्देशनमा बन्ने चलचित्रका लागि अक्षयले महंगो पारिश्रमिक लिएपछि यसले चर्चा पाइरहेको छ।
भारतीय मिडियाका अनुसार, अक्षयले यो चलचित्रबाट २७ करोड पारिश्रमिक बुझेका छन्। याे कमाइ उनकाे केवल २ हप्ताको सुटिङका लागि मात्रै हाे।
आनन्दले पहिले ऋतिक रोशनलाई चलचित्रका लागि अफर गरेका थिए। तर, ऋतिकले चलचित्रमा काम गर्न नमानेपछि अक्षयलाई अफर गरिएको थियो। अतिथी भूमिकामा देखिनका लागि एक चर्चित नायकको खोजीमा रहेका आनन्दले अन्ततः अक्षयलाई महंगो पारिश्रमिक दिएर काम गराउन सफल भएका छन्।
