भारत र चीनबीचको ‘शीतयुद्ध’ नयाँ मोडमा पुगेको छ । सीमा विवादसँगै बोर्डरमा देखिएको भारतको राष्ट्रवाद अहिले आर्थिक राष्ट्रवादमा रुपान्तरण भएको हो । लद्दाखको गलवान उपत्यकास्थित भारत–चीन सीमा क्षेत्रमा चिनियाँ सेनासँग भएको झडपमा २० जना भारतीय सैनिक मारिएपछि भारतले चिनियाँ वस्तु तथा सेवालाई बहिस्कार गर्ने अभियान नै चलेको छ । सोमबारमात्रै भारत सरकारले चिनियाँ कम्पनीले प्रवद्र्धन गरेको ५९ वटा मोबाइल एप्लिकेसनलाई भारतमा प्रतिबन्ध गर्ने घोषणा गरेको छ । आन्तरिक सुरक्षामा खतरा निम्तिएको भन्दै भारतले यी मोबाइल एप्लिेकेसनहरु बन्द गरिदिएको हो । यसमा टिकटक, विच्याट, क्याम्सक्यानर, शेयरइट, हेल्लो, भिभोभिडियो, युसीब्राउजर जस्ता चर्चित एप्लिकेसनहरु समावेश छन् ।
यी सबै एप्लिकेसनलाई जोड्ने हो भने भारतमा यसको डाउनलोड संख्या १०० करोड भन्दा धेरै हुने अनुमान गरिएको छ । भारतले यो कदमबाट चीनको एप बजारको ३० देखि ४० प्रतिशत व्यापार गुम्ने दाबी गरिरहेको छ । भारतमा १५ करोड टिकटक एप्लिकेसन डाउनलोड भएको अनुमान गरिएको छ । टिकटकले मात्रै यो साल भारतबाट १ अर्ब रुपैयाँ भन्दा बढीको नाफा लैजाने लक्ष्य लिएको थियो ।
