एक अमेरिकी सैनिकमाथि आफ्नै सैनिक युनिटमाथि आतंककारी आक्रमणको योजना भएको अभियोग लागेको छ। 

अमेरिकी सञ्चारमाध्यमका अनुसार २२ वर्षे सैनिक इथन मेल्जरले आफ्नो युनिट एम्बुसमा पार्नका लागि जानकारीहरु नियो–नाजी समूह अडर अफ द नाइन एन्जल्सलाई प्रदान गरेको अभियोग लागेको छ।

मेल्जरले गोप्य जानकारीहरु चरमपन्थी समूहलाई प्रदान गर्ने र सो समूहले सैन्य युनिटमा आक्रमण गर्ने योजना बनाएको आरोप छ। मेल्जरको योजना मेको अन्त्यमा संघीय अनुसन्धान ब्यूरो (एफबिआई) र अमेरिकी आर्मीले विफल पारेको थियो। मेल्जर जुन १० मा पक्राउ परेका थिए।

अमेरिकाको न्याय विभागले अडर अफ द नाइन एन्जल्सलाई जादू या अदृश्य शक्तिमा आधारित नियो–नाजी र रंगभेदबाट प्रेरित चरमपन्थी समूहका रुपमा परिभाषित गर्ने गरेकाे छ।

मेल्जर सन् २०१८ को डिसेम्बरमा अमेरिकी सैनिकमा प्रवेश गरेका थिए। उनले सन् २०१९ को जुनदेखि पूर्ण क्षमतामा काम गर्न थालेका थिए।