नेपालमा हरेक राजनीतिक परिवर्तनपछि नागरिकताको विषयमा सधैं बहस र विवाद हुँदै आएको छ। २००७ सालको राजनीतिक परिवर्तनपछि सुरु भएको नागरिकता विवाद अहिलेसम्म टुंगो लागेको छैन। बरु नयाँनयाँ विवाद र समस्या आउने गरेका छन्। २०६२/६३ को आन्दोलन हुँदै संविधानसभाबाट नयाँ संविधान जारी भएपछि पनि नेपालमा नागरिकताको विषय टुंगो लाग्न सकेको छैन। उल्टै पछिल्ला वर्षहरूमा विवाद उत्कर्षमा पुगेको छ।  

संविधानविद् भीमार्जुन आचार्य नेपालमा कसैलाई खुसी पार्नेगरी नागरिकता बनाउने नीति ल्याउन खोज्दा विवाद र समस्या आएको भए पनि अहिले त्यस्तो नरहेको बताउँछन्। ‘अबको नेपालमा कसैलाई खुसी पार्नेगरी नागरिकता बनाउने नीति ल्याउन सक्ने अवस्था छैन, नागरिकतामा नरम नीति सम्भव पनि हुँदैन,’ आचार्य भन्छन्, ‘स्वदेशीलाई भेदभाव गर्नुभएन, विदेशीलाई नागरिकता दिनेमा कडाइ गर्नुपर्छ। यो समाधान गर्न नसकिने विषय होइन।’