हामी बस्तीवाला हामी मस्ती वाला,

हामीलाई आनन्द छ सँधैं सँधैं

हामी प्रसस्तिवाला ,

पर्छ पानी भिज्छ छाला लाग्छ घाम सुक्छ छाला, अरू के पो होला , छैन हामीलाई केही वास्ता हामी बस्तीवाला ।

 

हामीलाई घरको छानु सिरू भए हुन्छ ,

हामीलाई खेती गर्न एकहल गोरू भए हुन्छ,

काम गर्छौ दिनभर बाहिरै , घरमा विश्वासको ताला,

छैन हामीलाई केही वास्ता हामी बस्तीवाला ।

चाँहिदैन पिज्जा बिरेनी ढिँडो भए पुग्छ ,

चाँहिदैन धारवाला पोशाक , ठुटे सुरूवालले हुन्छ

चाँहिदैन एयर कण्डिसन र एल,ई,डी बल्ब , बाल्छौं तेलका पाला,

छैन हामीलाई केही वास्ता हामी बस्तीवाला ।

 

आफ्नै अन्न आफ्नै बारी आफनै छ तरकारी ,

गाई आफ्नै मल आफ्नै चाहिएन मल सरकारी,

घुम बन्छौं ढोका बन्छौं , बन्छौं नाङला ढाला ,

छैन हामीलाई केही वास्ता हामी बस्तीवाला ,।

 

हली बाउसे रोपाहार हाम्रा गोरू बलिया पाङरे,

साँदेको गुन्द्रुक भुटेको आलु खाजा मीठो चाम्रे ,

एक एक बटुको बाक्लो मोही तन तन तन्काउँदै ,

गाउँछन असारे खेतालाले रनबन रनकाउँदै,

खेतका गरामा जल् थल् पानी सलल बग्छन नाला ,

छैन हामीलाई केही वास्ता हामी बस्तीवाला ।

 

शहर बजारका सब्जिमण्डिमा लगाईदिन्छौ थुप्रो ,

बोकी लान्छै ढोकाभरि हुँदै हुँदै कुप्रो ,

थाप्लो कुच्चियो भारी बोक्दै पिल्सियो ढाडको छाला ,

छैन हामीलाई केही वास्ता हामी बस्तीवाला ।

 

चाँहिदैन हाई- फाई मोटर,मटर फलाए् हुन्छ ,

चाँहिदैन डोजर, ट्रयाक्टर हलो बनाए हुन्छ ,

पर्दैन हामीलाई गोदाम स्टोर बाख्राको खोर ठड्याए हुन्छ ,

आफ्नु काम आफैं गर्छौं पर्दैन तिर्नु ज्याला ,

छैन हामीलाई केही वास्ता हामी बस्तीवाला ।

 

साग सब्जि अन्न फलाई बेच्छौं बस्तीको भाउमा,

बाटै बिचमा खरिते हुन्छ नाफा खाने दाउमा ,

दुख गर्ने बस्तीवाला नाफाखाने अर्को

तर पनि सन्तोषै छ , छैन हामीलाई झर्को ,

दुखगर्छ बस्तीवालाले पाउँछ शहरले माला,

छैन हामीलाई केही वास्ता हामी वस्तीवाला ।

 

चाँहिंदैन बिल्डङ दरवार झुप्रो भए हुन्छ,

रूखपात पानी घाँस दाउरा थुप्रो भए हुन्छ ,

आफनै गाउँको मठ मन्दिरमा फूल चडाउन पाए हुन्छ ,

घर गाउँकै सरकारी स्कूलमा छोरा छोरी पढाउन पाए हुन्छ ,

यस्तै उस्तै गर्दै गर्दै जिवन बिति जाला ,

छैन हामीलाई केही वास्ता हामी बस्तीवाला ।

 

गाई गोरू भेडा बाख्रा हाम्रा ईष्टमित्र ,

पर्मापात ऐंचो पैंचो दुख सुख हुन्छ हामीभित्र ,

मज्जा रमाईलो बिहा बटुलो हाम्रै खालको हुन्छ ,

बाजा गाजा नाच गान  आफ्नै तालको हुन्छ ,

रिती रिवाज संस्कार संसकृति हाम्रो आफ्नै चाला ,

छैन हामीलाई केही वास्ता हामी बस्तीवाला ।

 

घुम बोरा हाम्रा ओतन , गहना ढोका नाम्ला

हसिया, कँचिया हातका बाला ,पटुकी डोरी दाम्ला ,

रातो पहेंलो कमेरो माटो हाम्रा घरका गहना,

ढिँडो रोटो तरूल बाबर मालपुवा खाना खजना.

कोठेबारीमा बार तगारा घरमा माकुरी जाला,

छैन हामीलाई केही वास्ता हामी वस्तीवाला ।

 

हामी बस्तीवाला हामी मस्तीवाला हामी प्रसस्तीवाला ,

छैन हामीलाई केही वास्ता हामी बस्तीवाला ।