बहुदलीय जननिर्वाचित पद्धतिमा संसद अर्थात अहिलेको परिवेशमा संघीय प्रतिनिधिसभा सर्वोच्च जनप्रतिनिधि थलो हो। त्यहाँ बस्ने सौभाग्य पाएका व्यक्तिहरु ‘सार्वभौम’ जनताका प्रतिनिधि हुन्। अर्थात त्यहाँ उनीहरुका अभिव्यक्ति, व्यवहार र आचरण ‘सार्वभौम’ हैसियत अनुरुप र सुहाउँदो हुनुपर्छ। अझ महत्वपूर्ण कुरा ती प्रतिनिधिहरु सार्वभौम जनताबाट छानिएका हुनाले उनीहरुको देशभक्ति या राष्ट्रप्रतिको बफादारीमाथि त्यसबेलासम्म कसैले प्रश्न उठाउन मिल्दैन, हुँदैन, जबसम्म सप्रमाण अन्यथा सावित हुँदैन।
तर दुर्भाग्य संसद कहिलेकाहीँ राजनीतिक ‘रत्यौली’ को थलो बन्यो भने? त्यहाँका कारवाही र सदस्यहरुको आचरणलाई जनताले नियालिराखेका हुन्छन्। राष्ट्रिय अस्मिता र अखण्डताको बारेमा, सदन सञ्चालनमा मर्यादा र शिष्ठताका बारेमा अभिव्यक्तिको शैली र भाषाबारेमा सदस्यहरुले निम्न स्तर देखाएमा त्यो समग्र मुलुककै छवि या स्तर भएको सन्देश बाहिर जानेछ।
