संविधान संशोधनका लागि गैरसरकारी विधेयक संसद् सचिवालयमा छाडेर हिँडेका राजपा नेताहरु आइतबार दर्ताका लागि संसद सचिवालय नैै गएनन् । त्यसैले उक्त विधेयक आइतबार पनि दर्ता भएन । संसद्का महासचिव डा. भरतराज गौतम भने राजपा नेताहरु आउने भनेर बिहान १० बजे नै संघीय संसद् सचिवालय पुगेर बसेका थिए ।
गैरसरकारी विधेयक निर्धारित ढाँचामा नलगी शुक्रबार ठाडो निवेदन लिएर गएका कारण दर्ता हुन नसकेको उक्त विधेयकलाई ‘तीन महले’ फर्म्याटमा तयार पारी आज १० बजे नै दर्ता गर्ने तय भएको थियो ।
त्यही अनुसार, ११ बजे संसद् सुरु हुने भए पनि महासचिव गौतम त्यसअघि नै सिंहदरबार पुगेका थिए । सदन सुरु गर्न बानेश्वर पुगेका महासचिव गौतम त्यसपछि पुनः सिंहदरबार गएका थिए । तर, कोही नआएपछि उनी फर्केको सचिवालय स्रोतले जनाएको छ।
अपरान्ह सिंहदरबार पुगेका सो दलका प्रमुख सचेतक लक्ष्मणलाल कर्ण समाजवादीको संसदीय दलको कार्यालयमा राजेन्द्र श्रेष्ठसँग भेट गरी फर्केका थिए । काेही पनि नेता संसदीय दलकाे कार्यालय नआएको राजपा संसदीय दलका एक कर्मचारीले बताए ।
संसद्का कानूनी सल्लाहकार अर्जुन खड्काले उक्त विधेयक शुक्रबार ‘फर्म्याट’ नमिलेकाले दर्ता हुन नसकेको बताउँदै दर्ता गर्न कुनै पनि कानूनी बाधा नभएको बताए । अपरान्ह उनले आश्चर्य व्यक्त गरे, ‘बिहानै दर्ता गर्ने कुरो थियो, अहिलेसम्म त भइसक्नुपर्ने ?’ अर्को काममा व्यस्त रहेका उनले दर्ता गर्न कुनै समस्या नभएको बताएका थिए ।
राजपासँग पार्टी एकता घोषणा गरिसकेको समाजवादी पार्टीले भने राजपाको संशोधनमा सहमति जनाइसकेको छैन । राजपाको गैरसरकारी संविधान संशोधन विधेयक दर्ता गर्न शुक्रबार जाँदा पनि समाजवादीका कोही पनि गएका थिएनन् । राजपा र समाजवादीका नेताहरुबीच पद व्यवस्थापनको कुरा नमिल्दा पार्टी एकता नै कानूनी रुपमा हुन सकेको छैन ।
विधेयक प्रस्तुत, यस्तो छ प्रक्रिया
उता, प्रतिनिधिसभामा सरकारी विधेयक भने टेबल भएको छ । टेबल गरिएको तीस दिनभित्र भोलिको गोरखापत्रमा उक्त विधेयक प्रकाशित हुनेछ । त्यसको सात दिनपछि सैद्धान्तिक छलफलका लागि प्रस्तुत हुने, ‘विचार गरियोस्’ भन्ने प्रस्ताव पारित गरेपछि संशोधनका लागि ७२ घन्टाको समय दिइने छ । एउटा मात्र बुँदा भएकाले त्यसमा संशोधन नपर्ने भएकाले त्यसपछि समिति गठन नहुने सीधै मतविभाजन गरी पारित गरिने छ । यसका लागि जेठ महिनाभरिको समय लाग्ने छ ।
