भारतबाट मानिसलाई आउन नदिन सप्तरीको छिन्नमस्ता गाउँपालिका–३ सखडाका युवाले रातभर जाग्राम बसेर चौकीदारी गर्न थालेका छन्। कोरोना भाइरसको सङ्क्रमण बेलामा समेत अवैध तस्करी नरोकिएपछि गाउँका १० युवाले १० दिनदेखि गाउँ भित्रिने नाकामा निगरानी गर्न थालिएको हो।
रातको समयमा सीमा क्षेत्र हुँदै प्रवेश गर्ने इलाकाको झ्याङ्ग, घारीमा युवा छरिएर लुकेर बस्छन् र मदिरा ओसार्न भारतबाट आउनेलाई समाउँछन्। ‘सीमानाका बन्द भएका बेला पनि आउजाउ रोकिएन, तस्करी रोकिएन, त्यसैले चौकीदारी बस्नुपरेको हो’, छिन्नमस्ता गाउँपालिका वडा नं ३ का वडाध्यक्ष दीपेन्द्रकुमार यादवले भने, ‘तस्करीले सङ्क्रमणको जोखिमसमेत बढ्यो, भरियालाई घेराउ गर्दै अबदेखि नआउने प्रतिबद्धता गराएर भारततर्फ नै फिर्ता पठाइदिन्छौँ।’
खाना खाएर सबै सुतिसकेपछि यिनीहरू चौकीदारीमा निक्लन्छन्, बिहानीपख आएर सुत्छन्। अवैध मदिराका लागि भारतीय नागरिक प्रवेश गर्छन् कि भनेर निगरानी गरिरहेको टोलीका संयोजक मिथलेश यादवले सुनाए।
अवैध मदिरा ओसार्न आउने भारतीयको चालढाल नै फरक हुन्छ। उनीहरू पनि पाँचदेखि १० जनाको समूहमा आउँछन्। युवाले सशस्त्र प्रहरीको पनि साथ लिएका छन्। नेपालबाट भारततर्फ मदिरा तस्करी गर्ने समूहले हतियारसमेत राख्ने गरेको पाइएकाले युवाले सशस्त्र प्रहरीको सहयोग लिएका हुन्। गत कात्तिक ५ गते सप्तरीबाट भारततर्फ मदिरा लग्ने समूहबाट ‘सिक्सर’ पेस्तोलसमेत बरामद भएको थियो।
पाँच जना सशस्त्र प्रहरी पनि युवाझै शैली अपनाउँदै उनीहरूसँग लुकेर बस्छन्। सबै जना घेरा हालेर छरिएका बसेका हुन्छन्। घेराभित्र मदिरा ओसार्ने भरिया पर्नासाथ चारैतिरबाट टर्च बालेर एकअर्कालाई सङ्केत गर्छन् र भारतीयलाई नियन्त्रणमा लिन्छन्। त्यसपछि शुरु हुन्छ, केरकार। रातको समयमा आउनुको औचित्य उनीहरूसँग मदिरा ओसार्नुबाहेक अरु हुँदैन। त्यसपछि नियन्त्रणमा लिइएका सबैलाई पोखरीमा नुहाउन लगाउँछन्, शारिरीक अभ्यासस्वरूप घुँडा र कुहिनो टेकाएर हिँडाउँछन्, अनि अबदेखि नेपाल प्रवेश गर्दैनौँ भनेर पटक–पटक कसम (प्रतिबद्धता) खुवाउन लगाउँछन् र कोरोना भाइरसका बारेमा सम्झाएर भारत फिर्ता पठाउँछन्।
दिनभर प्रहरी, सशस्त्र प्रहरीको ठूलो सङ्ख्यामा गस्ती हुने गरेकाले अवैध मदिराको तस्करी रातको समयमा हुने गरेकाले युवा पनि रातकै समयमा चौकीदारी गर्न थालेका हुन्। ‘रातको समयमा मदिरा लिन भारतीय आउँछन् कि भनेर चौकीदारी गर्छौँ’, नुनु मखियाले भनिन्। भारतको बिहार राज्यमा मदिरा बिक्री वितरण र प्रयोगमा रोक लगाएदेखि नै नेपालबाट बिहारतर्फ मदिरा तस्करी बढेको छ। भारतबाट भने लागुऔषध, बिँडी, खैनी, रजनीगन्धा, गुटखाजस्ता सामग्री भित्रिने गरेको छ। प्रहरी गस्तीले मात्र नियन्त्रण असम्भव भएका बेला स्थानीय युवाले सो क्षेत्रमा चौकीदारी गर्न थालेपछि भारतबाट मदिरा ओसार्ने भरिया आउन छाडेको स्थानीयवासी विनोद यादवले बताए।
प्रायः मदिरा तस्करी रातको समयमा हुने गर्छ। तसर्थ रातको समयमा नियमित चौकीदारी गर्छन्। युवाहरू दिउँसो पनि बेला–बेलामा छड्के जाने गरेका छन्। प्रसिद्ध शक्तिपिठ छिन्नमस्ता भगवतीको मन्दिर भएको सखडामा अरु बेला आवतजावत बाक्लै हुन्थ्यो। विश्वव्यापीरूपमै कोरोना भाइरसको महामारी फैलिएपछि गाउँमा सङ्क्रमण नहोस् भन्न शक्तिपिठसमेत बन्द गरिएको छ। सीमानाका बन्द भएदेखि नै नेपाल–भारतबीच आउजाउमा रोक लगाइएको छ। आवतजावत रोक्न सुरक्षा पहरामा कडाइ गर्दै सशस्त्र प्रहरीले सप्तरीको ७८ किलोमिटरको दूरीमा ५४ वटा चौकी खडा गरी नियमित गस्ती गरिरहेको छ। भारतीय सीमामा रहेको छिन्नमस्ता गाउँपालिकाको वडा नं २ मा दुई, वडा नं ३ मा तीन र वडा नं ४ मा तीन क्याम्प रहेको छ। वडा नं ३ मा थप एउटा सुरक्षा बेसक्याम्पसमेत छ। दिउँसो सुरक्षा व्यवस्था कडा भएपछि मदिराको तस्करी रातको समयमा हुने गरेकाले युवाहरु पनि राति चौकीदारी गर्न थालेका हुन्।
अहिले उनीहरू दिउँसो पनि खटेका छन्। एक साताअघि भारतले रेल सेवा सञ्चालन गरेपछि भारतको विभिन्न राज्यमा अड्किएका नेपाली ठूलो सङ्ख्यामा नेपाल भित्रिरहेका छन्। ‘भारतबाट फर्किएका नेपालीलाई सिधैँ घर जान दिँदैनौँ’, वडाध्यक्ष यादवले भने, ‘त्यस्ता व्यक्तिलाई १४ दिन क्वारेन्टिनमा राखेर परीक्षण गराएर मात्र घर पस्न दिने गरेका छौँ।’ रासस
यो पनि हेर्नुहोस्
.jpg)
