राजु लामिछाने

रूकुम पश्चिमको आठसविकोट नगरपालिका वडा नं. ३ खदि स्थित एक घरमा आगलागी हुँदा एक महिलाको ज्यान गएको छ भने एक जना पुरुष घाईते भएका छन्। शनिबार बिहान पौने ११ बजेतिर भएको आगलागीमा परी ३५ वर्षीया लाली बोहरा देवकोटाको मृत्यु भएको जिल्ला प्रहरी प्रमुख प्रहरी नायब उपरीक्षक ठगबहादुर केसीले जानकारी दिए।

आगो निभाउने क्रममा उनका श्रीमान डम्बर देवकोटा घाइते भएका छन्। तीन तलाको ६ कोठे घरमा बिहान खाना पकाउने क्रममा भण्डारण गरिएको पेट्रोल लिक भएपछि आगलागी भएको अनुमान गरिएको छ। आगलागीका कारण घरभित्रको सम्पूर्ण सामान जलेर नष्ट भएको छ।

सम्पूर्ण क्षतिको विवरण भने संकलन भइसकेको छैन। वडाध्यक्ष केशरमान विकले गाउँमा ठूलो मानिएको घर एकै छिनमा जलेको बताए। आगो नियन्त्रण छिट्टै गरिए पनि महिलालाई भान्साबाट निकाल्न नसक्दा मृत्यु भएको उनको भनाई छ।

घरको पहिलो तलामा तेल भण्डारण गरिएको थियो भने दोस्रो तलामा भान्सा रहेको प्रहरीको भनाई छ। आगो लागि भइरहेका बेला ४ छोराछोरी भने घर बाहिर रहेको बताइएको छ।