अमेरिकाका विभिन्न राज्यमा राष्ट्रपति डोनाल्ड ट्रम्पका पक्षधरहरुले लकडाउनको विरोध गर्दै प्रदर्शन गरेका छन्। ट्रम्पले प्रदर्शनकारीको समर्थन गरेपछि प्रदर्शनका घटना बढेका हुन् ।

बिहीबार ट्रम्प प्रशासनले लकडाउन हटाउने योजना सार्वजनिक गरेको भोलिपल्ट प्रदर्शन भएका हुन् । बिहीबार पनि उनले प्रदर्शनकारीको समर्थन गरेका थिए ।

कोरोना भाइरसको संक्रमण फैलिन नदिनका लागि राज्यहरुले घरमै बस्नु पर्नेसहितका लकडाउनका कडा नियमहरु लागु गरेका छन् । त्यसको विरोधमा ट्रम्प समर्थकहरुले बन्दुकसहित बाहिर निस्किएर प्रदर्शन गरेका हुन् ।

लकडाउन अन्त्य गर्न माग गर्दै मिसिगन, ओहायो, नर्थ क्यारोलाइना, मिनेसोटा, उटा, भर्जिनिया र केन्टुकीमा प्रदर्शन भएको हो । 

यसअघि ट्रम्पले राज्यमा प्रतिबन्ध हटाउनेबारे आफूले नै निर्णय लिनसक्ने बताएका थिए। यद्यपि, पछि उनी यसको निर्णय राज्यका गभर्नरको हुनुपर्ने र संघीय सरकार यसमा दिशानिर्देशमात्र जारी गर्न सक्ने कुरामा राजी भएका थिए ।

LIBERATE VIRGINIA, and save your great 2nd Amendment. It is under siege!

— Donald J. Trump (@realDonaldTrump) April 17, 2020

प्रदर्शनकारीले लकडाउनका कारण आर्थिक गतिविधि ठप्प भएको र त्यसले नागरिकलाई समस्यामा पारेको बताएका छन् । ट्रम्पले ट्वीट गरेर प्रदर्शनकारीको समर्थन गर्दै लकडाउन खुकुलो पार्न माग गरेका हुन् । उनले मिनेसोटा, मिसिगन तथा भर्जिनियामा लकडाउन खुकुलो पार्नु पर्ने भन्दै ट्वीट गरेका छन् ।

तर स्वास्थ्य अधिकारीले भने लकडाउन हटाएमा वा खुकुलो पारेमा संक्रमण थप फैलिन सक्ने चेतावनी दिएका छन् ।

अमेरिकामा शुक्रबार पनि २५ सय भन्दा बढीको मृत्यु भएको छ । अहिलेसम्म ज्यान गुमाउनेको संख्या ३६ हजार ७७३ भन्दा बढी रहेको छ । यस्तै संक्रमितको संख्या पनि अमेरिकामा झण्डै सात लाख पुगेको छ।