‘६५ वर्षको भएँ बा, दमको रोग छ त नि । दमको रोग लागेको २०/२२ वर्ष नै भइसक्यो, औषधि खान थालेको पनि १५ वर्ष भयो । अहिले खै के आयो आयो यस्तो ! आत्मबल बलियो बनाउन सके जस्तोसुकै रोगलाई पनि जित्न सकिँदो रहेछ । मैले रोगलाई जितेँ ।’

यो भनाइ कोरोनाभाइरस संक्रमित बागलुङ नगरपालिकाकी ६५ वर्षीया वृद्धाको हो ।

गत चैत २० गतेबाट धौलागिरी अञ्चल अस्पतालको आइसोलेशनमा भर्ना भएकी उनी आफू पूर्ण रुपमा निको हुने र साधारण अवस्थामा फर्किनेमा पूर्ण विश्वस्त छिन् । हामीले वैशाख ४ गते बिहीबार कुराकानी गर्दा उनको खुशीको सीमा थिएन । खुशी हुँदै सुनाइन्, ‘अस्पताल बसेको आज १५ दिन भयो पहिला–पहिलाका रिपोर्टहरु खराब आएका थिए, आज रिपोर्ट राम्रो आएछ । अब भोलि एउटा (पुनः थ्रोट) जाँच गर्ने अरे, त्यो पनि राम्रो आयो भने त म घर जान पाउँछु ।’