चीनको उहान उद्गमस्थल मानिएको कोभिड–१९ लाई कतिपयले ‘चाइनिज भाइरस’, ‘एसिएन भाइरस’, ‘उहान भाइरस’जस्ता नामले परिचय दिने गरेका छन् । पछिल्लो समय अमेरिकी राष्ट्रपति डोनाल्ड ट्रम्पले यस भाइरसलाई ‘चाइनिज भाइरस’को संज्ञा दिएका छन् । यस्ता किसिमका भाष्यको प्रयोग गरिँदै हाल चिनियाँ मात्र नभई सम्पूर्ण एसियाली मूलका मानिसमाथि घृणा व्यक्त गरिएको छ । कतिपय स्थानमा त उनीहरुमाथि भौतिक हमला समेत गरिएको तथ्य विभिन्न संचार माध्यममा आएका छन् ।
यस विश्व परिवेशमा कोभिड–१९ जुन गतिमा अगाडि बढ्दैछ त्यही गतिमा समाजमा अफवाह, घृणा, लाञ्छना पनि फैलिँदैछ । यस अर्थमा यो सामाजिक रोग हो । यसलाई रोक्न विश्व स्वास्थ्य सङ्गठनले कोरोना भाइरसको नाम नै परिवर्तन गरी कोभिड–१९ राखेको हो । यति मात्र होइन, सामाजिक लाञ्छनाविरुद्ध उत्रन उसले हरेक देशका सरकारलाई सुझाएको पनि छ । तर, नेपाल सरकारले यसका विरुद्ध उत्रनुको सट्टा आफ्नै नागरिकलाई विदेशबाट स्वदेश आएकै भरमा सामाजिक लाञ्छना लगाएको छ ।
