मान्छेहरुका मन–मनमा 
बेचैनी छाएका बेला
विश्व नै आत्तिएर 
जनजनमा उदासी छाएका बेला 
तिम्रो आगमनलाई म उत्साहिन देखिरहेको छु । 

कसरी गरौं म तिम्रो स्वागत 
म आफै अलमलिएको छु ।
तिम्रो आगमनमा फूलेका फूलहरूलाई पनि 
ओइलाइरहेको भेटेको छु ।

मान्छेहरुका आँखा रित्तिएका छन्  
मनहरूमा चिरा परेका छन् ।  
बिपतको यो समयमा 
सायद, हिराहरूमा पनि 
किरा परेका छन् । 

नयाँ सालको नयाँ दिन पनि 
पुरानै दिनझैँ अन्योलमा बितिरहेको छ ।
कहाँ मात्र भनौ 
संसारकै भूगोलमा यस्तै भइरहेको छ ।

आशा गर्छु यो नयाँ सालमा 
असिम महामारीको यो रोग हटोस् 
मान्छेमा व्याप्त भय र त्रास हटोस् 
विश्व फेरि पुरानै लयमा फर्कोस् । 

कतै पनि लडाई झगडा नहोस् 
बाँच्न सहज होस्, खान सबैलाई पुगोस् । 
महामारीबाट पाठ सिकेर
सर्वत्र भाइचारा बढोस् 
यिनै आशा र भरोसा बोकेर 
तिम्रो आगमनको अघिल्तिर 
संघारमै म उभिरहेको छु ।
र, तिमीलाई भन्नुपर्ने कुरा 
मनमनै भनिरहेको छु ।