ऊहान ! आधुनिक विश्वको पछिल्लो इतिहासमा एउटा त्यस्तो नाम, जसले संघर्ष, बलिदान र त्यागको एउटा अद्वितीय मिसाल कायम गरेको छ । सारा संसारलाई नै यतिखेर हायलकायल र आतंकित बनाइरहेको कोरोनाभाइरसको उद्गम स्थल मानिएको ऊहान सहरले कोरोनाभाइरसको महाव्याधिमाथि विजय प्राप्त गर्नको लागि गरेको संघर्षको कथा अनि त्याग र बलिदानको मिसाल निक्कै अनुकरणीय र उच्च सम्मानयोग्य रहेको छ । कोरोनाभाइरसको वैश्विक महामारी जति आश्चर्यजनक र उदेकलाग्दो छ, ऊहानले त्यसका विरुद्ध गरेको संघर्ष त्योभन्दा कम छैन ।
आजभन्दा चार महिनाअघि कोरोनाभाइरसको संक्रमणले छपक्कै ढाकेको शहर ऊहान यतिचाँडो आफ्नो लयमा फर्केला भनेर शायद कमैले सोचेका थिए होला । तर यतिखेर ऊहान शहर कोरोनोभाइरसको त्यो महाव्याधिलाई पछारेर आफ्नो पुरानो लयमा फर्कन खोज्दैछ । यही क्रममा करिब अढाइ महिनाको, ठ्याक्कैभन्दा ७६ दिनको अत्यासलाग्दो, पट्यारलाग्दो र सम्भवतः विश्व मानव इतिहासकै सबैभन्दा ठूलो ‘लकडाउन’ ऊहानबाट गत अप्रिल ८ अर्थात् चैत २८ गतेदेखि हटाइएको छ । सारा संसारका लागि, अझ भनौं स्वयं चिनियाँ जनताका लागि समेत त्यस अवधिभरमा बर्जित र निषेधित शहर ऊहान पुनः सबैका लागि खुला भएको छ ।
