राधेश्याम दाहाल -
गलत ढङ्गबाट सूचना संप्रेषण भएका कारण दोस्रो विश्व युद्ध भएको पत्रकारिता अध्ययन गर्ने सन्दर्भमा अहिले पनि सान्दर्भिक छ। आजको दुनियाँमा कुनै पनि देश सबैभन्दा शक्तिशाली वा बलियो हुन सक्ने मुख्य आधार भनेकै उसँग भएको सूचनाको भण्डार नै हो। अहिले जेजस्तो रुपमा अगाडि बढेको छ त्यसको मुख्य कारक तत्व भनेको सूचनाको सार्वजनिकीकरण नै हो। चाहे त्यो सूचना वा जानकारी सही ढङ्गले पुगेको होस् या गलत। समाजमा कुनै न कुनै रुपमा मिडियाको प्रभाव छ। कुनै पनि क्षेत्रको क्षमता र दक्षता कतिसम्म छ र उसले कुन तहको भावना राखेर काम गरेको छ भनेर पुष्टि गर्ने सबैभन्दा बलियो आधार तय गर्न संकट नै आउनु पर्ने रहेछ। संकटमा त्यो क्षेत्रले कस्तो भूमिका निर्वाह गर्छ त्यसबाट नै उसको औकात प्रष्ट हुने रहेछ।
नेपाली पत्रकारिता क्षेत्रमा झण्डै दुई दशकदेखि सक्रिय रहँदैगर्दा धेरै खालका आरोह अवरोहको प्रत्यक्षदर्शी भइयो। कति आरोह अवरोधमा सक्रिय पनि भइयो होला। ती विषय पनि अहिले चर्चा गरिरहनुपर्छ जस्तो लागेन। पत्रकारिताको विद्यार्थी भएका कारण नेपालको पत्रकारिता र संचार क्षेत्र यस्तो भइदिए हुन्थ्यो जस्तो लागेको थियो, छ र रहिररहने छ। पत्रकारिता क्षेत्रबाहेक अन्य क्षेत्रमा लगाव राख्न जानिएन र सकिएन पनि। त्यसैले अब यस क्षेत्रको विकल्प कम्तिमा मेरा लागि छैन।
