‘लकडाउनको एक हप्ताको अवधिमा पनि प्रसुतिगृहमा दैनिक ६५ देखि ७० जना महिला सुत्केरी’
माया श्रेष्ठ
कोरोनाभाइरस (कोभिड १९) संक्रमणको मनोवैज्ञानिक त्रास प्रायः सबैमा छ । संक्रमित व्यक्तिसँगको सम्पर्कमा आएर संक्रमण हुन सक्ने सम्भावनाभन्दा पनि यतिबेला संक्रमण रोकथाम तथा नियन्त्रणका क्रममा चालिएका केही प्रतिबन्धात्मक कदमले सर्वसाधारणमा मनोवैज्ञानिक त्रास बढाउन थालेको हो ।
यतिबेला सामान्य रोगको उपचारमा समेत प्रतिबन्धको अवस्था छ । अस्पतालहरुमा आकस्मिकबाहेकका सबै सेवा बन्द छन् । त्यसबाट नेपालकै सबैभन्दा ठूलो र जटील समस्याहरु आउँदा देशभरिबाटै सिफारिश गरेर पठाइने थापाथलीस्थिति प्रसुति गृह भनेर चिनिने परोपकार प्रसुति तथा स्त्री रोग अस्पताल पनि अछुतो छैन । परिणामस्वरुप प्रसुति तथा स्त्रीरोग अस्पताल थापाथलीमा बहिरङ्ग सेवा बन्द छ । जसका कारण गर्भवती भएका अनि सुत्केरी हुने मिति नजिकिदैँ गरेका महिलाहरुमा मनोवैज्ञानिक त्रास बढी नै देखिन्छ ।
परोपकार प्रसुति तथा स्त्रीरोग अस्पतालमा बहिरङ्ग विभागमा सामान्यतया दैनिक दुई सयभन्दा बढी महिला सेवा लिन आउने गर्दथे । तर ‘लकडाउन’ र कोरोनाभाइरस रोकथाम तथा नियन्त्रणका लागि सरकारले जारी गरेका प्रतिबन्धात्मक आदेशका कारण हाल बहिरङ्ग सेवामा आउने बिरामी प्रभावित भएका छन् ।
