काठमाडौं - सामान्य अवस्था हुन्थ्यो भने यति बेला मध्यपुर बोडेका बुद्धिकृष्ण बाग श्रेष्ठआठौं पटक जिब्रो छेडाउने तयारीमा जुटेका हुन्थे। तर यसपटक स्थिति फेरिएको छ, उनी कोरोना संक्रमति बिरामीको सेवाका लागि व्यक्तिगत सुुरक्षा पोसाक (पिपिई) लगाएर तयारी अवस्थामा छन्।
कोरोना संक्रमितका लागि व्यवस्थापन गरिएको अत्याधुनिक एम्बुलेन्सको चालक भई सेवा दिन लागेका उनले संस्कृति जोगाउन पटकपटक जिब्रो छेडेको सुनाए। ‘हो, संस्कृति जोगाउन विगतमा सातपटकसम्म जिब्रो छेडें,’ उनले भने, ‘देश र जनतालाई जोगाउन अहिले एम्बुलेन्स चालकका रुपमा अहोरात्र खटिएको छु।’ ठिमीक्षेत्रको सांस्कृतिक धरोहरका रुपमा समेत परिचित श्रेष्ठ मध्यपुर ठिमी नगरपालिकाद्वारा सञ्चालित नेपाल कोरिया मैत्री नगरपालिका अस्पतालमा एम्बुलेन्स चालकका रुपमा कार्यरत छन्।
बिस्केट जात्राका अवसरमा वैशाख २ गते हुने जिब्रो छेड्ने जात्रा यस क्षेत्रको प्रमुख जात्रा मानिन्छ। तेलमा डुबाइएको १० इन्च लामो फलामको सुइराले जिब्रो छेडेर बजार परिक्रमा गर्दा श्रेष्ठलाई हजारौंले श्रद्धापूर्वक नियाल्थे। ‘अबजात्रा देखाउने र हेर्ने सबै मिलेर कोरोनालाई हराउनु पर्छ,’ श्रेष्ठले नागरिकसँग भने, ‘समुदाय सकुशल रहे जात्रा फेरिफेरि मनाउनेछौं।’
