बाँकेको राप्तीसोनारी गाउँपालिका–९ ढकेरीस्थित महेन्द्र राजमार्गमा ट्रक र स्कुटी एकापसमा ठोक्किँदा एकको मृत्यु भएको छ भने दुईजना गम्भीर घाइते भएका छन्। 

मृत्यु हुनेमा कपिलवस्तु निवासी विष्णु बेल्वासे रहेका छन् भने गम्भीर घाइते हुनेमा उनकी श्रीमती विन्दु बेल्बासे र छोरी बिपना रहेकी छन्। 

नेपालगञ्जदेखि दाङतर्फ जाँदै गरेको भे९प ७८१७ नंको स्कुटी र कोहलपुरतर्फ आइरहेको लु२ख २३४० नंको ट्रक एकापसमा ठोक्किँदा स्कुटी चालक विष्णुको घटनास्थलमा नै मृत्यु भएको हो। 

घाइते दुवैको शिक्षण अस्पताल कोहलपुरमा उपचार भइरहेको जिल्ला ट्राफिक प्रहरी कार्यालयका प्रमुख प्रहरी निरीक्षक पवीन्द्र बमले जानकारी दिए। प्रहरी चौकी ढकेरीका इन्चार्ज प्रहरी सहायक निरीक्षक कुमार केसीका अनुसार दुवै सवारीसाधन तीव्र गतिमा रहेकाले उक्त दुर्घटना भएको हो। 

दुर्घटनापछि ट्रक र चालकलाई नियन्त्रणमा लिई कानूनी कार्वाहीका लागि इलाका प्रहरी कार्यालय कोहलपुर पठाइएको उनले बताए।