सत्तारुढ दल नेपाल कम्युनिस्ट पार्टी (नेकपा) एकपछि अर्को काण्डमा मुछिँदै जाँदा कार्यकर्ताहरु असुरक्षित महसुस गर्न थालेका छन्।
प्रधानमन्त्री केपी शर्मा ओलीले पटकपटक आफ्ना कार्यकर्ताहरुलाई सरकारको कामको बचाउ गर्न निर्देशन दिँदै आएका छन्। प्रधानमन्त्रीकै भाषामा भन्ने हो भने, 'अरिंगाल'हरु सरकारको बचाउमा लाग्नु पर्ने थियो। तर, पार्टीका नेताहरु, सरकारका मन्त्रीहरु एक पछि अर्को काण्डमा मुँछिँदै जाँदा 'अरिंगाल'हरु सरकारको बचाउ भन्दा पनि आफ्नै बचाउमा लाग्नुपर्ने अवस्था आइपरेको छ।
ललिता निवास प्रकरणमा पार्टीका महासचिव विष्णु पौडेल मुछिए। त्यतिबेला पार्टीका अरिंगालहरु पौडेलको बचाउमा अभिव्यक्ति दिँदै गए। जसोतसो नाक जोगाउनकै लागि र पार्टीका सदस्यको जिम्मेवारी पूरा गरे। यसरी पौडेलको बचाउ गर्नेमा पूर्व एमालेहरु देखिएका थिए।
अख्तियारले विशेष अदालतमा दायर गरेको मुद्दामा विष्णु पौडेललाई जग्गा फिर्ता गर्ने सहमति गरेको भन्दै चोख्याइयो।
त्यसपछि आयो महरा प्रकरण। संसद सचिवालयकी कर्मचारीलाई बलात्कार गरेको आरोप लाग्यो। उनी तीन महिना कारागारमा बसे। उनलाई अदालतले सफाइ दियो।
महरा प्रकरणलाई नेकपाका 'अरिंगाल'हरुले राष्ट्रियातासँग जोडेर महरालाई निर्दोष भनिरहे। नेकपा भित्रको पूर्व माओवादीको एउटा समूह उनको पक्राउलाई मिलिनियम च्यालेन्ज कर्पोरेसन (एमएमसी)सँग जोडेर बचाउमा लागिरहे।
