स्पेनले क्याटलान पृथक्तावादी नेताहरूलाई जेल हालेपछि स्वतन्त्र क्याटलोनियाको पक्षमा हजारौँ मानिसहरूले बार्सिलोनामा प्रदर्शन गरेका छन्।
स्पेनको सर्वोच्च अदालतले सोमाबार नौ क्याटलान नेताहरूलाई नौदेखि १३ वर्षको कारावास सजाय सुनाएको थियो । ।अरू तीन जनालाई जेल सजाय नभए पनि उनीहरूले अवज्ञा गरेको ठहर गर्दै जरिबाना सुनाइयो।
सजाय सुनाइएका सबै जनाले आफूविरुद्ध लगाइएको अभियोग अस्वीकार गरेका थिए।ती पृथक्तावादी नेताहरूलाई सन् २०१७ मा भएको जनमतसङ्ग्रह गरेर राज्यद्रोह गरेको अभियोग लगाइएको थियो। स्पेनले उक्त जनमतसङ्ग्रह अवैधानिक भएको दाबी गरेको थियो।
त्यसपछि त्यहाँ आन्दोलन चर्किएको छ।स्वतन्त्र क्याटलानको वकालत गर्ने एउटा दलका भूतपूर्व उपनेता जूआन टार्डाले शान्तिपूर्ण प्रदर्शन गरेका छन्।ट्विटरमा उनले अल्पसङ्ख्यकहरूको हिंसात्मक गतिविधि र अनियन्त्रित प्रहरी बल स्वतन्त्रताका लागि घातक हुने उल्लेख गरेका छन्।
क्याटलोनियाको क्षेत्रीय सरकारका प्रवक्ताले सरकारको ती प्रदर्शनकारीप्रति सहानुभूति भएको र उनीहरूको आक्रोश बुझेको बताएका छन्।दोस्रो दिनको विरोधप्रदर्शनमा प्रदर्शनकारी र प्रहरीबीच भिडन्तहरू भएका छन्।प्रदर्शनकारीहरूले ठाउँठाउँमा आगो बाले तथा सरकारी कार्यालयहरूमा पस्ने प्रयास गरेका थिए।बार्सिलोनामा सरकारी भवनहरूमा बलपूर्वक छिर्न खोज्ने आन्दोलनकारीहरूलाई तितरबितर पार्न दङ्गा प्रहरीले अश्रुग्यास प्रहार तथा बल प्रयोग गरेको थियो।
हजारौँ प्रदर्शनकारीहरूले बार्सिलोनाको एल प्राट विमानस्थल जाने बाटो छेकेका थिए।त्यस कारण १०० वटाभन्दा बढी उडानहरू स्थगित भएका थिए।
स्पेनका अधिकारीहरूले अशान्ति मच्चाउने कामको संयोजन कसले गरिरहेको छ त्यसको अनुसन्धान भइरहेको बताएको छ।प्रदर्शनकारीहरूले एउटा मोबाइबल एप प्रयोग गरिरहेको बताइएको छ। त्यो एपले उनीहरूलाई विभिन्न सहरमा आन्दोलन गर्ने ठाउँको दिशानिर्देश गर्छ।
