जाडोयाम सुरु भइरहँदा देशमा चुनावी सरगर्मी बढेको छ । आगामी मङ्सिर १४ मा हुन लागेको उपनिर्वाचनको गर्मी यतिबेला ह्वात्तै बढेको छ । उपनिर्वाचनमध्ये, प्रतिनिधि सभा सदस्यका लागि हुने निर्वाचन क्षेत्र कास्की २ मात्रै हो । तत्कालीन पर्यटन मन्त्री रवीन्द्र अधिकारीको हेलिकप्टर दुर्घटनामा परी मृत्यु भएपछि रिक्त रहेको कास्की २ लाई यतिबेला निकै महत्त्वका साथ हेरिएको छ । कास्की २ को उपनिर्वाचनमा साना ठूला र स्वतन्त्र गरी २२ जना उम्मेदवार भिड्ने छन् ।
कास्की २ को उपनिर्वाचनका लागि सत्तारुढ नेकपाले स्वर्गीय अधिकारी पत्नी विद्या भट्टराईलाई जिल्लाबाट एकलौटी उम्मेदवारको रूपमा नाम सिफारिस गरेको थियो । नेकपा केन्द्रले पनि उनैलाई उम्मेदवारका रूपमा उठाएको छ । भट्टराईको चुनावी योजना, चुनाव जितेर आइसकेपछिका काम र राजनीतिक आरोह अवरोहबारे रातोपाटीले कुराकानी गरेको छ । उनै विद्यासँग गरिएको कुराकानीको अंश :-
