काठमाडौं - सुख के हो दुख के हो, मनले खोज्ने खुसी के हो...
राजेन्द्र थापाको शब्द र अरुणा लामाको स्वरले सजिएकोे ‘पोहोर साल खुसी फाट्दा’ बोलको गीतको यस पंक्तिले नेपालीका कठिनाइ उजागर गरेको छ। यो मिठो गीतमा सुखको परिभाषा र मनको खुसी के हो भनेर खोजिएका छ। यतिका वर्षपछि पनि यो गीत उत्तिकै मनमोहक छ। शब्द र भावको अर्थ उत्तिकै सान्दर्भिक छ।
यो प्रसंग, सरकारले यो वर्ष गर्न चाहेको राष्ट्रिय सुख सर्वेक्षणसँग पनि जोडिन्छ। यो साता प्रस्तावित राष्ट्रिय सुख सर्वेक्षणबारे नागरिक र रिपब्लिकामा समाचार प्रकाशन भएपछि यो विषयमा आमनागरिक र विज्ञले थप प्रतिक्रिया दिएका छन्। एउटा सरकारी कार्यक्रमभन्दा पनि यो सर्वेक्षण विषयवस्तुको हिसाबले एउटा चिन्तन र दर्शन भएकाले यसका विभिन्न पक्षबारे थप छलफल गर्नुपर्ने साझा राय सबैको छ। प्रतिक्रियाहरुका क्रममा कतिपयले यो सर्वेक्षण आवश्यक छ र भन्नेसम्म भनाइ राख्न भ्याए।
