'मैले अझै अर्को डरलाग्दो स्थिति जितेँ।'
नायिका श्वेता खड्काले अस्पतालको शैयाबाट लेखेको स्टाटसको सार हो यो।
आज (सोमबार) बिहान उनले 'मेरो दोस्रो जीवन' शीर्षकमा एउटा लामो स्टाटस लेखिन्। उनले सेयर गरेको फोटो उनका शुभचिन्तकले अपेक्षा गरेकोभन्दा बेग्लै थियो। अस्पतालको शैयामा लम्पसार परेकी उनको मुखमा 'अक्सिजन मास्क' लगाइएको थियो। गर्धन चिरिएको ठाउँमा पाइप जोडिएको थियो। एउटा बट्टामा सानो मासुको चोक्टो राखिएको थियो।
बिहेको एक महिनामै जीवन साथी श्रीकृष्ण श्रेष्ठलाई गुमाएर लामो समय शोकमा रहेकी उनको यो अवस्था सबैको लागि अनपेक्षित थियो।
केही दिनअघिसम्म मिडियामा छाइरहेकी श्वेताले अहिले नै अस्पतालको शैयामा लम्पसार पर्नुपर्छ भनेर कल्पनै गरेकी थिइनन्। किनकि, उनी केही दिनअघिसम्म सिन्धुपाल्चोकको माझी बस्ती बनाउने काममा सक्रिय थिइन्। स्वस्थ र फुर्तिली देखिन्थिन्। कुनै रोग भएको छनक देखिँदैन थियो।
